پاکستان ناقابل تسخیر ایٹمی قوت بن چکا ہے، ڈاکٹر ثمر مبارک مند

پاکستان نے مئی 1998ء میں ایٹمی دھماکا کر کے دنیا میں اپنی طاقت منوالی، نئی نسل اب استحکام پاکستان کیلئے اپنا مثبت کردار ادا کرے، خطاب

جمعرات 21 اکتوبر 2021 21:00

پاکستان ناقابل تسخیر ایٹمی قوت بن چکا ہے، ڈاکٹر ثمر مبارک مند

لاہور(اُردو پوائنٹ اخبارتازہ ترین - این این آئی۔ 21 اکتوبر2021ء) ایٹمی سائنسدان ڈاکٹر ثمر مبارک مند نے کہا ہے کہ اب کوئی وطن عزیز کی طرف میلی آنکھ سے نہیں دیکھ سکتا، پاکستان ناقابل تسخیر ایٹمی قوت بن چکا ہے۔ڈاکٹر ثمر مبارک مند نے نجی یونیورسٹی کی تقریب سے خطاب کے دوران کہا ہے کہ بھارت نے ایٹمی دھماکا کیا تو طاقت کے توازن کے لیے ہم ایٹمی طاقت بن گئے، پاکستان نے مئی 1998ء میں ایٹمی دھماکا کر کے دنیا میں اپنی طاقت منوالی، نئی نسل اب استحکام پاکستان کے لیے اپنا مثبت کردار ادا کرے۔

(جاری ہے)

انہوں نے کہا کہ قیام پاکستان کے وقت فی کس آمدن 60 ڈالر تھی، آج 1200 ڈالر پر پہنچ گئی، ملک کا لٹریسی ریٹ 12 فیصد تھا آج 70 فیصد سے تجاوز کر گیا۔ڈاکٹر ثمر مبارک مند نے کہا کہ قیام پاکستان کے وقت ہم 50 میگاواٹ بجلی امرتسر سے منگواتے تھے، آج ہم 33 ہزار میگاواٹ بجلی خود پیدا کر رہے ہیں۔ڈاکٹر ثمر مبارک مند نے کہا ہے کہ ہم 303 کی گولی نہیں بنا سکتے تھے، آج ٹینک، میزائل، فائٹر ایئر کرافٹ بنا رہے ہیں۔ایٹمی سائنسدان ڈاکٹر ثمر مبارک مند نے کہا کہ طاقت کا توازن قائم ہے عوام سکھ کی نیند سورہے ہیں،حکومت کو تعلیم صحت سمیت فلاحی منصوبوں پرکام کرنا ہوگا۔