عمران سرکار آئندہ انتخابات چوری کرنے کے لیے ہر حربہ طے کر رہی ہے‘ لیاقت بلوچ

انتخابی اصلاحات کے لیے متفقہ قومی پالیسی کے لیے تمام جمہوری قوتوں، حکومت اورریاست کو ایک پیج پر آنا ہو گا

جمعرات 2 دسمبر 2021 00:20

لاہور(اُردو پوائنٹ اخبارتازہ ترین - این این آئی۔ 02 دسمبر2021ء) نائب امیر جماعت اسلامی لیاقت بلوچ نے کہا ہے کہ عمران سرکار آئندہ انتخابات چوری کرنے کے لیے ہر حربہ طے کر رہی ہے۔ انتخابی اصلاحات کے لیے متفقہ قومی پالیسی کے لیے تمام جمہوری قوتوں، حکومت اورریاست کو ایک پیج پر آنا ہو گا۔ حکومتی اقدامات غیرآئینی، غیر جمہوری ہیں۔ حکومت الیکشن کمیشن آف پاکستان کو نشانہ بنا رہی ہے۔

مسلم لیگ اور پیپلزپارٹی این اے 133کے ضمنی انتخابات میں ’’ووٹ کو عزت دو‘‘ کے بیانیہ کی دھوم دھام سے تدفین کر رہی ہیں۔ جماعت اسلامی قومی متفقہ انتخابی اصلاحات اور غیر جانبدارانہ انتخابات کے لیے ملک گیر مہم چلائے گی۔لیاقت بلوچ نے کہا کہ مہنگائی، بے روزگاری، افراطِ زر اور یوٹیلٹی بلز کا بوجھ اس قدر بڑھ گیا ہے، جس کا چھوٹے موٹے ریلیف سے عوام کو کوئی سہولت نہیں ملے گی۔

(جاری ہے)

اقتصادی حالات کو سنبھالنے کے لیے دوست ملکوں سے قرضہ اور آئی ایم ایف کی سخت ترین شرائط کے سامنے حکومتی سرنڈر معیشت کو مزید تباہ کرے گا۔ اقتصادی بحران کی صورت حال گھمبیر ہے۔ پی ٹی آئی حکومت کی ساکھ زمین بوس ہوچکی۔ قومی قیادت نے بحران کے خاتمہ کے لیے حل نہ نکالا تو ملک دیوالیہ ہو گا۔ ایٹمی صلاحیت رول بیک، فوجی صلاحیت مفلوج کرنے کا دبائو بڑھ جائے گا۔

اسٹیبلشمنٹ کو جانبدار چھوڑ کر قومی اور غیر جانبدار کردار ادا کرنا ہو گا۔لیاقت بلوچ نے بلوچستان گوادر میں کئی روز سے جاری ’’گوادر کو حق دو‘‘ دھرنے کے مطالبات پر وفاق، صوبہ اور سرکاری اداروں کی بے حسی شرم ناک ہے۔ خواتین، مرد، نوجوان اور ماہی گیر سراپا احتجاج ہیں۔ مولانا ہدایت الرحمن کی قیادت میں عوامی مطالبات کو تسلیم کیا جائے۔

سی پیک منصوبہ کے ثمرات کا پہلا حق گوادر کے عوام کا ہے۔لیاقت بلوچ نے لاہور میں عوامی وفود سے ملاقات میں کہاکہ لاہور میں چوری، ڈکیتی، سٹریٹ کرائم، منشیات فروشی دھڑلے سے ہو رہی ہے۔ حکومت ہر مافیا کی سرپرست بنی ہوئی ہے۔ لاہور میں فضائی آلودگی، سموگ کے سدباب کے لیے پنجاب حکومت نے بروقت اقدامات نہیں کیے۔ لاہور میں گیس کی لوڈشیڈنگ کی صورت حال ابتر ہے۔ حکومت بلدیاتی نظام کو بااختیار اور عوام کی سہولت کا نظام بنانے کی بجائے اندرونی سازشوں کا شکار ہے۔ سندھ میں پی پی حکومت بلدیاتی نظام کے ساتھ ظالمانہ عوام دشمن کھلواڑ کر رہی ہے۔

لاہور شہر میں شائع ہونے والی مزید خبریں:

Your Thoughts and Comments