کسی بھی صوبے کے وسائل پر سب سے پہلا حق اس صوبہ کے عوام کا ہوتا ہے

لاہور ( اردوپوائنٹ اخبار تازہ ترین۔ آئی پی اے ۔ 21 اپریل 2025ء ) امیر جماعت اسلامی حافظ نعیم الرحمن سے جمعیت علماء اسلام (ف) کے سربراہ مولانا فضل الرحمن نے منصورہ میں ملاقات کی اور غزہ میں جاری صورت حال پر تبادلہ خیال کیا۔ جے یو آئی کے سربراہ نے سابق نائب امیر پروفیسر خورشید احمد کی وفات پر حافظ نعیم الرحمن سے اظہار تعزیت کیا اور مرحوم کی دینی و ملی خدمات کو خراج تحسین پیش کرتے ہوئے ان کے درجات کی بلندی کے لیے دعا کی۔

مولانا فضل الرحمن وفد کے ہمراہ جن میں مولانا امجد خان، راشد محمود سومرو اور دیگر قیادت شامل تھی منصورہ آئے۔ نائب امیر لیاقت بلوچ، سیکرٹری جنرل امیر العظیم، مرکزی رہنما ڈاکٹر فرید احمد پراچہ اور جماعت اسلامی کے دیگر رہنما بھی اس موقع پر موجود تھے۔

(جاری ہے)

ملاقات کے بعد پریس کانفرنس کرتے ہوئے دونوں رہنماؤں نے غزہ میں جاری صہیونی سفاکیت اور اس پر اسلامی دنیا کے حکمرانوں کی خاموشی اور او آئی سی کے کمزور موقف پر اظہار تشویش کیا۔

دونوں اطراف کی قیادت نے ایک دوسرے کے لیے نیک خواہشات کا اظہار کرتے ہوئے اس امر پر زور دیا کہ تمام سیاسی جماعتوں کو متحد ہو کر اسرائیلی مظالم پر جاندار موقف اختیار کرنے کی ضرورت ہے۔ حافظ نعیم الرحمن نے کہا کہ سیاسی جماعتوں کو امریکا اور اسرائیل کی مذمت کرنی چاہیے۔ ان کا کہنا تھا کہ جماعت اسلامی جے یو آئی سمیت تمام مذہبی و سیاسی جماعتوں سے مشترکات پر رابطے اور بات چیت جاری رکھے گی، تاہم جماعت اسلامی سیاسی جدوجہد صرف اپنے پلیٹ فارم سے ہی کرے گی۔

انھوں نے منصورہ آمد پر مولانا فضل الرحمن اور ان کے وفد کا شکریہ ادا کیا۔ صحافیوں کے سوالات کے جوابات دیتے ہوئے امیر جماعت نے واضح کیا کہ جماعت اسلامی نے 26ویں آئینی ترمیم کو کلی طور پر مسترد کیا اور ہمارا موقف واضح ہے کہ آئینی ترمیم سے عدلیہ کمزور ہوئی ہے۔ اسی طرح انھوں نے الیکشن دھاندلی سے متعلق جماعت اسلامی کے دیرینہ موقف کو دہراتے ہوئے کہا کہ ہم چاہتے ہیں کہ دھاندلی کی تحقیقات فارم 45کی بنیاد پر ہونی چاہیے، ملک کو فارم 45کے آئینی ڈاکومنٹ کے موجود ہونے پر نئے الیکشن کی نہیں بلکہ گزشتہ انتخابات کی تحقیقات کی ضرورت ہے۔

انھوں نے کہا کہ ملاقات میں دونوں اطراف کی قیادت میں اتفاق پایا گیا کہ ملک میں آئین کی بالادستی کے قیام کی ضرورت ہے، تمام ادارے اپنی آئینی حدود میں کام کریں۔ اسی طرح مہنگائی اور معیشت کی خراب صورت حال پر ان کے اور مولانا فضل الرحمن کے درمیان گفتگو ہوئی۔ انھوں نے کہا کہ حکومت کے دعوؤں کے باوجود عوام مہنگائی کی چکی میں پس رہے ہیں، جماعت اسلامی عوام کے حقوق کے لیے جدوجہد جاری رکھے گی۔

موجودہ حالات میں انسانیت اور امت کا سب سے بڑا مسئلہ غزہ کی صورت حال ہے، جماعت اسلامی کی فلسطین پر عوامی بیداری مہم جاری رہے گی۔ مولانا فضل الرحمن نے کہا کہ غزہ کے مسئلہ پر پوری امت میں اضطراب ہے اور اس حوالے سے او آئی سی کو واضح اور جاندار موقف اپنانے کی ضرورت ہے۔ ان کا کہنا تھا کہ جے یو آئی نے غزہ پر مشترکہ جدوجہد کے لیے مجلس اتحاد امت پلیٹ فارم تشکیل دیا ہے۔ انھوں نے کہا کہ صوبائی وسائل پر سب سے پہلا حق صوبہ کے عوام کا ہے۔ انھوں نے کہا کہ 26ویں آئینی ترمیم پر مختلف جماعتوں کا مختلف موقف ہو سکتا ہے، جسے بڑے اختلاف سے تعبیر نہ کیا جائے۔