پیپلزپارٹی اور ن لیگ کے بیانات بجٹ کی ناکامیاں زائل کرنے کیلئے صرف نورا کشتی ہیں

لاہور ( اردوپوائنٹ اخبار تازہ ترین۔ آئی پی اے ۔ 12 جون 2025ء ) نائب امیر جماعت اسلامی، سیکرٹری جنرل ملی یکجہتی کونسل لیاقت بلوچ نے کہا ہے کہ بجٹ کی ناکامیوں اور عوام پر آئی ایم ایف کی ڈکٹیشن پر مبنی نظام مسلط کرنے کے زہر کو زائل کرنے کے لیے پی پی پی اور مسلم لیگ ن کی ایک دوسرے کے خلاف بیان بازی نوراکُشتی ہے. پی پی پی اور مسلم لیگ ن اتحادی ہیں، حکومتیں انجوائے کررہے ہیں اور دونوں ہی ایک دوسرے کی ناکامی، نااہلی اور عوام دشمنی کو بینقاب کررہے ہیں، پی پی پی مسلم لیگ اتحادی حکومت سیاست، جمہوریت، زراعت اور معیشت پر بڑا بوجھ ہے.

سرکاری فنڈ سے چلائی گئی حکومتی تشہیری مہم غیر قانونی اور عوام کیساتھ بڑا فراڈ ہے. اب اس غیرقانونی حکومتی اقدام کو تحفظ دینے کے لیے بدنیتی پر مبنی قانون سازی کی جارہی ہے، ملک کے اندر جاری سیاسی بحران ختم کرنا قومی سلامتی کیلیے ناگزیر ہے۔

(جاری ہے)

قومی سیاسی جمہوری قیادت کو اسٹیٹس مین شپ کا مظاہرہ کرتے ہوئے بامعنی، بامقصد قومی ڈائیلاگ کا راستہ اختیار کرنا ہوگا۔ لیاقت بلوچ نے منصورہ میں قومی سیاسی اُمور پر مشاورت کی؛ معروف ماہرِ تعلیم، سینئر پروفیسر شیخ محمد رفیق کی اہلیہ کی وفات پر جنازہ کے شرکاء سے خطاب کیا؛ معروف زمیندار، کسان رہنما عثمان تارڑ نے رہائش گاہ پر ملاقات کی اور زراعت، کسانوں کے مسائل پر بریفنگ دی؛ معروف کالم نویس اور سماجی رہنما چوہدری حمد اکرم کے عشائیہ میں شرکت کی، اِس موقع پر فرید احمد پراچہ بھی ساتھ تھے.

لیاقت بلوچ نے کہا کہ وفاقی بجٹ میں عملاً زراعت کسان/ہاری کے مسائل کو مکمل طور پر نظرانداز کردیا گیا ہے، زراعت کے شعبے سے متعلق مسائل کے حل کے لیے صوبوں کو کوئی روڈ میپ نہیں دیا گیا. حکومت نے آئی ایم ایف سے جاگیرداروں  کے لیے ہر طرح کا تحفظ حاصل کرلیا لیکن زراعت اور غریب کے خاتمہ کا حکم مان لیا ہے. وزیرِ خزانہ اور چیئرمین ایف بی آر، سیکرٹری جزانہ نے پوسٹ بجٹ پریس کانفرنس میں آئی ایم ایف کے سامنے بیبسی، ناکام بجٹ اور مِنی بجٹ لانے کا خود ہی اعلان کردیا۔ وفاقی بجٹ کے نفاذ سے صنعت، تجارت کا پہیہ مفلوج رہے گا، زراعت بڑی زبوں حالی سے دوچار ہوگی، آئی ٹی، سولر انرجی، کنسٹرکشن سیکٹر بدستور مشکلات کا شکار رہیں گے.

حکومت اور اقتصادی ٹیم تسلیم کرے کہ اُن کا پیش کردہ بجٹ ناکارہ اور معیشت کے لیے اور عوام کے لیے موت کا پروانہ ہے. حکومت سنجیدگی کا مظاہرہ کرے اور بجٹ کا ازسرِنو جائزہ لے کر اسے پاکستان دوست، عوام دوست اور غریب عوام کے لیے َزحمت کی بجائے رحمت کا ذریعہ بنائے۔ لیاقت بلوچ نے غزہ فلسطین میں امدادی مراکز پر اسرائیلی فوج کے حملوں سے مزید 120 فلسطینیوں کی شہادت پر شدید غم و غصے کا اظہار کرتے ہوئے کہا کہ ناجائز صیہونی ریاست اسرائیل کی ناجائز سرپرستی خود امریکہ کے لیے دنیا بھر میں رُسوائی کا سبب بن رہی ہے.

امریکی پالیسی سازی صیہونیت کی ڈکٹیشن کے تابع ہے. مشرقِ وسطیٰ ممالک کو بلیک میل کرکے اسرائیل کے ناجائز وجود کے تحفظ کی پالیسی سے امریکہ دنیا بھر میں غیر اہم ہورہا ہے. فلسطین و کشمیر کے مسائل کا حل عالمی امن کے لیے بنیاد کا پتھر ہے۔ فلسطینیوں، کشمیریوں کی آزادی، حق خودارادیت کے حصول کے لازوال تاریخ ساز قربانیاں رائیگاں نہیں جائیں گی. عالمِ اسلام اتحاد اور عالمی مسائل پرواضح، دوٹوک اور یکساں مؤقف و حکمتِ عملی عالمی قوتوں کو مِلتِ اسلامیہ کے مسائل حل کرنے پر مجبور کردے گا، وگرنہ ہر مسلم ملک  اِسی طرح مصائب و مشکلات، بحرانوں اور خوفناک بے یقینی کا شکار رہے گا۔