جنرل ہسپتال کے شعبہ سرجیکل میں ٹیم ورک اور بہتر ورکنگ ماحول کیلئے ورکشاپ کا انعقاد

لاہور۔19جولائی(اُردو پوائنٹ اخبارتازہ ترین - اے پی پی۔ 21 جولائی2018ء) جنرل ہسپتال شعبہ سرجیکل کے زیر اہتمام اپنی نوعیت آپ کی پہلی تربیتی ورکشاپ Group Dynamics and Conflict Management"-"منعقد کرائی گئی جس میں ڈاکٹرز ، نرسسز اور پیرا میڈیکل سٹاف کی باہمی مشاورت اور ورکنگ کے حوالے سے مختلف سیشن ہوئے، پروفیسر آف سرجری ڈاکٹر فاروق افضل کی سربراہی میں ورکشاپ کے شرکاء کو ڈیوٹی اوقات کے دوران مل جل کر کام کرنے کے حوالے سے لیکچرز دیئے گئے جن میں مریضوں سے دوستانہ ماحول کو یقینی بنانے بارے تبادلہ خیال کیا گیا، ڈاکٹر عمرا ن کھوکھر نے کہا کہ کسی بھی ہسپتال کا ماحول مریضوں کی صحت یابی میں اہم کردار ادا کرتا ہے اور تمام سٹاف کواس حوالے سے اپنی ذمہ داریاں پوری کرنی چاہئیں، ورکشاپ میں پرنسپل پوسٹ گریجویٹ میڈیکل انسٹیٹیوٹ پروفیسر آغا شبیر علی اور میڈیکل سپرنٹنڈنٹ ڈاکٹر محمود صلاح الدین کا خصوصی پیغام پڑھ کر سنایا گیا جن کی حوصلہ افزائی سے اس تربیتی ورکشاپ کا انعقاد کیا گیا ہے ، یہاں یہ امر قابل ذکر ہے کہ یہ اپنی طرز کی پہلی ورکشاپ پہلے مرحلے میں سرجیکل ڈیپارٹمنٹ میں رکھی گئی ہے جس کا دائرہ کار دیگر شعبوں میں بھی بڑھایا جائیگا ، اس عمل سے ہسپتال کے عملے کے باہمی تعلقات اور ذہنی صلاحیتوں کو بہتر بنانے میں مدد ملے گی اور ڈاکٹرز ، نرسسز اور میڈیکل سٹاف کی استعداد کار میں بھی اضافہ ہو گا، پروفیسر فاروق افضل نے اس ورکشاپ کو پیشہ ورانہ سرگرمیوں کیلئے اہمیت کا حامل قرار دیا اور شرکاء کیلئے کامیابی اور نیک خواہشات کا اظہار کیا۔