ڈیرہ غازی خان ٹیچنگ ہسپتال میں 97 فیصد تعمیراتی کام مکمل‘سیکرٹری ہیلتھ کا دورہ ،ہسپتال میں داخل مریضوں کو خریدی گئی ادویات کی رقم واپس کرادی

لاہور۔8اکتوبر(اُردو پوائنٹ اخبارتازہ ترین - اے پی پی۔ 08 اکتوبر2018ء) ڈیرہ غازی خان ٹیچنگ ہسپتال میں 97 فیصد تعمیراتی کام مکمل کرلیا گیا، سنٹرلی ہیٹ اینڈ کولنگ سسٹم کیلئے بیشتر مشینری بھی نصب کرلی گئی ،سیکرٹری ہیلتھ پنجاب ثاقب ظفر کو بریفنگ میں بتایا گیا کہ ہسپتال میں کارڈیالوجی، ڈرماٹالوجی، پلاسٹک سرجری سمیت 7 اہم شعبے نئی عمارت میں فنکشنل کئے جائیں گے، وزیراعلیٰ پنجاب کی ہدایت پرسیکرٹری ہیلتھ پنجاب ثاقب ظفر خصوصی ٹیم کے ساتھ 3 روزہ دورے پر ڈیرہ غازی خان پہنچے جہاں انہوں نے ٹیچنگ ہسپتال سمیت متعدد سرکاری طبی مراکز کا معائنہ کرکے سہولتوں کی فراہمی کا جائزہ لیا۔

ایڈیشنل سیکرٹری ڈاکٹر شہناز نعیم، ڈی جی منیر احمد اور دیگر افسر بھی ساتھ ہیں۔ ٹیچنگ ہسپتال کے دورے میں کمشنر ڈیرہ غازی خان رانا گلزار احمد اور ڈپٹی کمشنر علی اکبر بھٹی نے سیکرٹری ہیلتھ کو ہسپتال میں جاری مختلف ترقیاتی منصوبوں پر بریفنگ دی۔

(جاری ہے)

سیکرٹری ہیلتھ نے ٹراما سنٹر ، ایمرجنسی،نیو گائنی وارڈ اور میڈیسن سٹور کا معائنہ کیا۔ وارڈ کے معائنے کے دوران بعض مریضوں نے شکایت کی کہ انہیں کچھ ادویات باہر سے خریدنا پڑی ہیں۔

ثاقب ظفر نے سخت برہمی کا اظہار کرتے ہوئے ایم ایس ہسپتال کو ہدایت کی کہ فوری طور پر مریضوں کو خریدی گئی ادویات کی رقم واپس کی جائے۔انہوں نے کہا کہ ہسپتال میں داخل مریضوں کو ہرگز باہر سے کوئی دوائی نہ خریدنے کیلئے کہا جائے۔ سیکرٹری ہیلتھ نے ہسپتال کے زیر تعمیر 370 بیڈ کے توسیعی منصوبہ کا بھی جائزہ لیتے ہوئے کہا کہ مجموعی طور پر سینئر پروفیسرز کی کمی ہے۔ محکمہ صحت روٹیشن پر یہاں سنیئر پروفیسروں کو تعینات کررہا ہے تاکہ پسماندہ علاقوں میں بھی علاج کی اعلیٰ سہولیات دستیاب ہوں۔ ضلع ڈیرہ غازی خان کے تمام مراکز صحت کے اعداد و شمار اکٹھے کئے جارہے ہیں،جلد مثبت تبدیلی آئیگی۔ ثاقب ظفر نے کہا کہ ہسپتال کے لئے درکار مزید فنڈز بھی جلد جاری کردیے جائیں گے۔