سی سی پی او لاہور بی اے ناصر سے منتخب نمائندوں اور سینئر سیاسی رہنمائوںکی ملاقات

ہفتہ 19 جنوری 2019 23:57

لاہور۔19 جنوری(اُردو پوائنٹ اخبارتازہ ترین - اے پی پی۔ 19 جنوری2019ء) کیپٹل سٹی پولیس آفیسر لاہور ایڈیشنل آئی جی بی اے ناصر سے منتخب نمائندوں اور سینئر سیاسی رہنمائوں نے ان کے دفتر میں ملاقات کی۔ڈی آئی جی انویسٹی گیشن لاہورڈاکٹر انعام وحید ، ڈی آئی جی آپریشنز لاہور محمد وقاص نذیر ، ایس ایس پی ایڈمن منتظر مہدی اور دیگر پولیس افسران بھی اس موقع پر موجود تھے۔

ملاقات میں محکمہ پولیس کی جانب سے صوبائی دارلحکومت میں امن وامان کی صورتحال بہتر بنانے کیلئے کئے گئے اقدامات کا جائزہ لیا گیا۔

(جاری ہے)

سی سی پی او نے سیاسی رہنمائوں کو امن و امان کا قیام یقینی بنانے کے لئے محکمہ پولیس کی کوششوں اور لائحہ عمل سے تفصیلی طور پر آگاہ کیا۔ملاقات میںپولیس افسران اور منتخب نمائندوں نے امن و امان کی مجموعی صورتحال مزید بہتر بنانے کے لیے مختلف تجاویز پر تبادلہ خیال کیا ۔منتخب نمائندوں نے لاہور پولیس کی جانب سے شہریوں کے جان و مال کی حفاظت اور سکیورٹی یقینی بنانے کے لئے لاہور پولیس کے اقدامات کو سراہا۔اجلاس میں اس بات پر زور دیا گیا کہ عوامی نمائندوں اور پولیس افسران کی ملاقاتوں اور باہمی مشاورت کا سلسلہ آئندہ بھی جاری رکھا جائے ۔