پنجاب سیف سٹیز اتھارٹی کا شاہراہوں پر موٹرسائیکل اور بس کیلئے الگ لین بنانے کا فیصلہ

لاہور۔18 اپریل(اُردو پوائنٹ اخبارتازہ ترین - اے پی پی۔ 18 اپریل2019ء) پنجاب سیف سٹیزاتھارٹی نے وزیراعلیٰ پنجاب کی ہدایت پر شاہراہوں پر موٹر سا ئیکلوں اور بسوں کیلئے الگ الگ لین متعارف کرانے کا فیصلہ کیا ہے،ابتدائی طور پر مال روڈ اورکینال روڈ پر گرین لین بنائی جائے گی جس کیلئے کمشنر لاہور مکمل تعاون کریں گے۔ ترجمان پنجاب سیف سٹیز اتھارٹی کے مطابق وزیراعلیٰ پنجاب کی ہدایت پر ٹریفک سسٹم کو بہتر بنانے کیلئے منصوبے کا آغاز کیا جا رہا ہے جس کے ذریعے لاہور کی شاہراہوں پر تیز رفتار اورآہستہ چلنے والی گاڑیاں جن میں موٹرسائیکل،بس،رکشہ،سائیکل ودیگرکم رفتارسے چلنے والی گاڑیاں شامل ہیں، ان کے لیے الگ لین بنا نے کا فیصلہ کیا گیا ہے تاکہ ٹریفک کی روانی کو برقرار رکھا جا سکے، اس ضمن میں ابتدائی طور پر گرین لین کا پائلٹ پراجیکٹ مال روڈ اور کینال روڈ لاہور سے شروع کیا جائیگا جس میں بسوں اور موٹر سائیکل کو مال روڈ پر بائیں لین میں چلنے کا پابند بنانے کی کوشش کی جائیگی، اس حوالے سے سیف سٹیزسینٹر میں سٹی ٹریفک پولیس،ٹیپا،لوکل گورنمنٹ اور تمام متعلقہ محکموں کے افسران کا اجلاس منعقد ہوا جس میں منصوبے کی بروقت تکمیل کیلئے کمشنر لاہور نے مکمل تعاون فراہم کرنے کی یقین دہانی کروائی۔

(جاری ہے)

ترجمان پنجاب سیف سٹیز اتھارٹی کا مزید کہنا تھا کہ شاہراہوں پرعلیحدہ لین کی پابندی کے لیے لاہور سٹی ٹریفک پولیس اور پنجاب سیف سٹیز اتھارٹی مل کرکام کریں گے۔