ایسٹر کا مذہبی تہوار کل منایا جائے گا ،مسیحی عبادتگاہوں کیلئے سکیورٹی کے فول پروف انتظامات

گرجا گھروں میں خصوصی عبادات کا اہتمام کیا جائیگا ،ملک وقوم کی سلامتی کیلئے دعائیں مانگی جائیں گی

ہفتہ 20 اپریل 2019 15:00

لاہور (اُردو پوائنٹ اخبارتازہ ترین - این این آئی۔ 20 اپریل2019ء) پاکستان سمیت دنیا بھر میں مسیحی برادری کل (اتوار )کو ایسٹر کا تہوار مذہبی جوش و خروش سے منائے گی،اس دن کی مناسبت سے گر جا گھروں میں خصوصی عبادات کی جائیں گی ،لاہور سمیت ملک بھر کے گر جا گھروں کے لئے سکیورٹی کے سخت انتظامات کئے گئے ہیں ۔تفصیلات کے مطابق دنیا بھر میں بسنے والے مسیحی آج اتوار کو اپنا تہوار ایسٹر مذہبی جوش و خروش سے منائیں گے۔

ایسٹر روزوں کے ایام کے بعد منایا جانے والا مسیحی تہوار ہے۔ اس سے قبل 40روزے رکھے جاتے ہیں۔ ایسٹر کو عید پاشکا یا عید قیامت المیسح بھی کہا جاتا ہے۔اس دن کی مناسبت سے مسیحی عبادتگاہوں میں خصوصی عبادات کی جائیں گی جس میں ملک و قوم کی سلامتی کے بھی خصوصی دعائیں مانگی جائیں گی ۔

(جاری ہے)

لاہور سمیت ملک بھر میں آج کے دن کیلئے سکیورٹی کو ہائی الرٹ کر دیاگیا ۔

مسیحی عبادتگاہوں کیلئے خصوصی سکیورٹی پلان ترتیب دیا گیا ہے جسکے تحت گرجا گھروں کے اندر اور باہر پولیس اہلکار تعینات رہیں گے جبکہ عبادت کیلئے آنے والوں کو جامع تلاشی کے بعد اندر داخل ہونے کی اجازت دی جائے گی ۔ گرجا گھروں کی طرف آنے والے راستوں پر ناکے لگائے جائیں گے جبکہ پولیس اور ایلیٹ فورس کے کمانڈوز اطراف میںپیٹرولنگ کریں گے۔

انسپکٹر جنرل پولیس پنجاب کیپٹن (ر) عارف نواز خان نے بھی ایسٹر کے موقع پر صوبہ بھر میں سکیورٹی انتظامات فول پروف بنانے کی ہدایت کی ہے ۔انہوں نے کہا کہ تمام فیلڈ افسران اپنے اپنے اضلاع میں مسیحی تقریبات کی سکیورٹی کو یقینی بنائیں، حساس عمارتوں اور عبادت گاہوں کے گرد موثر پٹرولنگ کو یقینی بنایا جائے،ایسٹر کے دن مسیحی رہنمائوں کے ساتھ مل کر پہلے سے سکیورٹی پلان ترتیب دیے جائیں ۔آئی جی عارف نواز نے کہا کہ پنجاب پولیس اقلیتوں کے حقوق اور ان کے تحفظ کو یقینی بنانے کے لیے ہر ممکن اقدامات کرے گی۔

لاہور میں شائع ہونے والی مزید خبریں