ملاوٹ مافیا کے خلاف کاروائیاں جاری، جعلی مرچیں تیار کرنے والا بے نامی یونٹ سیل ،

لاہور۔23 جولائی(اُردو پوائنٹ اخبارتازہ ترین - اے پی پی۔ 23 جولائی2019ء) وزیر اعلی پنجاب کی ہدایت پرملاوٹ مافیا کیخلاف کاروائیاں جاری رکھتے ہوئے پنجاب فوڈ اتھارٹی کی فوڈ سیفٹی ٹیموں نے شادی پورہ محلہ، بند روڈ میں جعلی مرچیں تیار کرنے والا بے نامی یونٹ سیل کر دیا۔5 ہزار 620 کلو ملاوٹ ذدہ سرخ مرچ پاؤڈر، ایک ہزار 300 کلو ثابت مرچ اور 150 کلو ہلد ی برآمدکر لی گئیں۔

تفصیلات کے مطابق پنجاب فوڈ اتھارٹی فوڈ سیفٹی ٹیموں نے شادی پورہ محلہ، بند روڈ میں کارروائی کرتے ہوئے جعلی مرچیں تیار کرنے والا بے نامی یونٹ کو سیل کر دیا۔صحت دشمن عناصر چاولوں کے چھلکوں کو کھلے رنگ دیکر جعلی مرچیں تیار کر رہے تھے۔ڈی جی فوڈ اتھارٹی کا کہنا تھا کہ موقع پر کیے گئے ٹیسٹ مثبت آنے پر کاروائی عمل میں لائی گئی۔

(جاری ہے)

کارروائی کے دوران 5 ہزار 620 کلو ملاوٹ ذدہ سرخ مرچ پاؤڈر، ایک ہزار 300 کلو ثابت مرچ اور 150 کلو ہلد ی بھی برآمد کی گئی۔

لکڑی کا برادہ،چاول کے چھلکے اور کھلے رنگوں کی بھی بھاری مقدار بھی موجود پائی گئی۔ جعلی مرچوں کو مختلف ناموں کی دلکش پیکنگ دیکر چھوٹی دوکانوں پر بھی سپلائی کیا جاتا تھا۔ویجیلنس ٹیموں نے سپلائی چین کی ریکی کر کے یونٹ کا پتہ لگایا۔ملاوٹی مرچوں اور مصالحہ جات کا استعمال پیٹ اورمعدے کی متعدد موذی بیماریوں کا باعث بنتا ہے۔کیپٹن (ر) محمد عثمان کا مزید کہنا تھا کہ پنجاب فوڈ اتھارٹی کی جانب سے کھلے مصالحہ جات کی فروخت پر مکمل پابندی عائدہے۔مزید بات کرتے ہوئے ڈی جی فوڈ اتھارٹی نے واضح کیا کہ حکومت پنجاب کے ویژن کے مطابق ملاوٹ مافیا کی سرکوبی کے لیے مسلسل کاروائیاں جاری ہیں۔