پی آئی اے کا بعد از حج آپریشن کا میابی کے ساتھ مکمل ہو گیا

وفاقی وزیر ہوا بازی غلام سرور خان اور چیف ایگزیکٹو آفیسر کی کامیاب حج آپریشن پر کارکنوں کو مبارکباد

پیر 16 ستمبر 2019 23:54

لاہور۔16 ستمبر(اُردو پوائنٹ اخبارتازہ ترین - اے پی پی۔ 16 ستمبر2019ء) پی آئی اے کا بعد از حج آپریشن کا میابی کے ساتھ مکمل ہو گیا۔ اس سلسلے میں آخری پرواز 15 ستمبر کو لاہور پہنچی۔ اس سال مجموعی طور پر 82,000 سے زائد حجاج کرام کو حرمین شریفین کی زیارت کی سعادت نصیب ہوئی جو گزشتہ سال کی نسبت 25 فیصد زائد رہی۔ پی آئی اے نے آٹھ شہروں سے حج آپریشن شروع کیا جن میں کراچی، ملتان، فیصل آباد، لاہور، سیالکوٹ، اسلام آباد، پشاور اور کوئٹہ شامل تھے ۔

سکھر اور رحیم یار خان سے بھی حجاج کو براستہ کراچی اور لاہور پروازوں کی سہولت دی گئی۔ حج آپریشن مکمل طور پر پی آئی اے کے اپنے بوئنگ 777 اور A320 طیاروں سے 290 پروازوں کے زریعے کیا گیا جن کی بروقت روانگی کا تناسب تقریبا " 90 فیصد رہا۔

(جاری ہے)

وفاقی وزیر ہوا بازی غلام سرور خان اور پی آئی اے کے چیف ایگزیکٹیو آفیسر ایئر مارشل ارشد ملک نے کامیاب حج آپریشن کی تکمیل پر پی آئی اے کے تمام شعبہ جات اور کارکنوں کو مبارکباد پیش کرتے ہوئے نمایاں کارکردگی دکھانے پر تعریفی اسناد دینے کا اعلان کیا ہے۔

ان میں بالخصوص فلایئٹ آپریشن، پسینجر سروسز، ٹی جی ایس، فلایئٹ سروسز،آئی ٹی،فنانس،مارکیٹنگ اور انجنیئرنگ شامل ہیں۔پی آئی اے نے سعودی عرب سے کراچی 21,100 لاہور 16700، اسلام آباد 15000، ملتان 4750، سیالکوٹ 4400، فیصل آباد 1750، پشاور 10400 اور کوئٹہ 8200 حجاج کو واپس پہنچایا۔