عوامی تحریک کے وفد کی چونیاں میں مقتول بچوں کے اہل خانہ سے ملاقات

زینب الرٹ بل قومی اسمبلی میں ایک سال سے پڑا ہے،پولیس کے محکمے کی تنظیم نو کی جائے‘سیکرٹری جنرل عوامی تحریک

ہفتہ 21 ستمبر 2019 19:14

لاہور(اُردو پوائنٹ اخبارتازہ ترین - این این آئی۔ 21 ستمبر2019ء) پاکستان عوامی تحریک کے اعلیٰ سطحی وفد نے چونیاں میں مقتول بچوں کے اہل خانہ سے ملاقات کی۔وفد نے غمزدہ والدین کو دلاسہ دیا اور سوگوار خاندانوں سے دلی ہمدردی کا اظہار کرتے ہوئے مطالبہ کیا کہ افسوسناک واقعہ کے ذمہ داران کو فوری گرفتار کرکے نشان عبرت بنایا جائے۔وفد میں سیکرٹری جنرل پاکستان عوامی تحریک خرم نواز گنڈاپور، نوراللہ صدیقی،حاجی امین انصاری،قاری ریاست و دیگر رہنما شامل تھے۔

خرم نواز گنڈا پور نے اس موقع پر غمزدہ والدین اور میڈیا سے گفتگو کرتے ہوئے کہا کہ ہر المیہ کے پیچھے پولیس کی بے حسی نظر آتی ہے۔جس واقعہ کو میڈیا رپورٹ کرتا ہے حکومتی مشینری حرکت میں آ جاتی ہے۔سانحہ چونیاں ایک ہولناک المیہ ہے،ملزموں کا جلدسراغ لگا کر انہیں نشان عبرت بنایا جائے۔

(جاری ہے)

جن درندوں نے ننھے پھولوں کو بے ددردی سے مسلا ہے وہ عبرت ناک سزاکے حقدار ہیں۔

زینب الرٹ بل قومی اسمبلی میں ایک سال سے پڑا ہے۔ایک آدھ ایس ایچ او معطل کرنے سے جرم ختم نہیں ہوگا۔پولیس کے محکمے کی تنظیم نو کی جائے۔پولیس میں اکثریت جرائم پیشہ عناصر کی ہے۔خرم نواز گنڈا پور نے کہا کہ بدقسمتی سے قصور میں ایسے واقعات پہلے بھی رونما ہو چکے ہیں ،افسوسناک سانحات کی روک تھام اور ملزموں کو عبرت ناک سزاد لوانے کیلئے موثر قانون سازی ضروری ہے ۔

انہوں نے کہا کہ ہماری تمام ہمدردیاں مقتول بچوں کے غم زدہ خاندانوں کے ساتھ ہیں۔پاکستان عوامی تحریک اور تحریک منہاج القرآن کی ہر ممکن معاونت متاثرہ خاندانوں کے ساتھ رہے گی۔چونیاں کے اندوہناک سانحہ پر ہر آنکھ نم ہے۔وفد نے مقتول بچوں کیلئے فاتحہ خوانی کی اورکہا کہ اللہ تعالیٰ غمزدہ خاندانوں کو صدمہ برداشت کرنے کا حوصلہ اور صبر جمیل عطا فرمائے۔