پی ڈی ایم کی قیادت مزاحمت اور قائد حزب اختلاف شہباز شریف مفاہمت کی جانب رواں دواں ہیں‘حافظ حسین احمد

بدھ 2 دسمبر 2020 15:12

کرمانوالہ (اُردو پوائنٹ اخبارتازہ ترین - این این آئی۔ 02 دسمبر2020ء) جمعیت علماء اسلام پاکستان کے ممتاز رہنما سابق سینیٹرحافظ حسین احمد نے کہا ہے کہ پی ڈی ایم کی قیادت مزاحمت اور قائد حزب اختلاف شہباز شریف مفاہمت کی جانب رواں دواں ہیں۔وہ اپنی رہائشگاہ جامعہ مطلع العلوم میں مختلف وفود سے گفتگو اور میڈیاکے سوالات کے جواب دے رہے تھے۔

(جاری ہے)

انہوں نے کہا کہ پیرول پر رہائی کے بعد نیشنل ڈائیلاگ کے لیے بے تاب قائد حزب اختلاف کے خلاف بھی اسٹیبلشمنٹ کو سیاست میں گھسٹنے پی ڈی ایم کے فائنل راونڈ میں مذاکرات کے ذریعہ اپوزیشن کے پیٹھ میں چھرا گھونپنے والی شخصیت کے خلاف بھی کوئی تادیبی کاروائی عمل میں لائی جائیگی یا بڑے میاں مذاحمت اور چھوٹے میاں مفاہمت کا ڈھونگ ہی رچاتے رہیں گے۔

انہوں نے مزیدکہا کہ آل شریف کا سیاسی کھیل ہی ’’پیسہ پھینک تماشہ دیکھ‘‘ ہے لیکن اس دور میں چونکہ طلب کچھ زیادہ رہی ہے اب نہ صرف تازہ ترین حساب بلکہ ماضی میں خرد برد کرنے والوں کو بھی حساب دینا پڑیگا۔ایک سوال کے جواب میں حافظ حسین احمد نے کہا کہ آزادی مارچ کے موقع پر آل شریف کی دولت پر رال ٹپکانے والے لہک لہک کر کہہ رہے تھے کہ’’وہ مال لگائیں گے اورہم جے یو آئی جان‘‘ اور عملاً ایسا ہی ہوا۔