ایل ڈی اے سٹی نیاپاکستان اپارٹمنٹس ، وزیراعظم نے دوہزاراپارٹمنٹس کی الاٹمنٹ کیلئے کمپیوٹرائزڈ قرعہ اندازی کر دی ‘ایس ایم عمران

لاہور (اُردو پوائنٹ اخبارتازہ ترین - این این آئی۔ 29 جولائی2021ء) لاہور ڈویلپمنٹ اتھارٹی کے وائس چیئرمین ایس ایم عمران نے کہا ہے کہ ایل ڈی اے سٹی نیا پاکستان اپارٹمنٹس وزیر اعظم عمران خان کا خواب تھا جس کی عملی تعبیر آج ہم سب کو نظر آرہی ہے۔ وزیر اعظم عمران خان نے ایل ڈی اے سٹی نیا پاکستان اپارٹمنٹس منصوبے کے پہلے مرحلے کے لیے دو ہزار عام شہریوں کی طرف سے نیفڈا(نیاپاکستان ہائوسنگ اینڈ ڈویلپمنٹ اتھارٹی)کو جمع کروائی جانے والی درخواستوں پرشفاف کمپیوٹرائزڈ قرعہ اندازی کر دی ہے جس پر ہم ان کا دل کی اتھاہ گہرائیوں سے شکریہ ادا کرتے ہیں۔

وائس چیئرمین ایس ایم عمران نے بتایا کہ وزیر اعظم عمران خان نے جن دو ہزارعام شہریوں کو نیفڈا کی طرف سے اپارٹمنٹس کی الاٹمنٹ کے لیے کمپیوٹرائزڈقرعہ اندازی کی ہے یہ وہ عام شہری ہیں جنہوںنے ایل ڈی اے سٹی نیاپاکستان اپارٹمنٹس منصوبے کے پہلے مرحلے کے چار ہزار اپارٹمنٹس کے لیے ایک سال قبل 250روپے فیس کے ہمراہ نیفڈا کو اپنی درخواستیں جمع کروائی تھیں۔

(جاری ہے)

اب قرعہ اندازی میں نیفڈا کی طرف سے جن دو ہزارامیدواروں کے نام نکلے ہیں ان کی لسٹ ویب سائٹ Www.naphda.gov.pkپر اپ لوڈ کر دی گئی ہے ۔ درخواست گزار عام شہری اس لسٹ میں اپنا نام چیک کر سکتے ہیں۔وائس چیئرمین ایس ایم عمران نے بتایا کہ یہ کامیاب امیدوارمتعلقہ بینکوں میں جا کر ایل ڈی اے کے ایسکرواکائونٹ میں اپنے پیسے جمع کروائیں گے اور نیفڈا ان کی تین لاکھ روپے سبسڈی انہیں فراہم کر دے گا۔

ان دو ہزار عام شہریوں کو ڈیڑھ سال بعد ان کے اپارٹمنٹس کا قبضہ دے دیا جائے گا۔ ایس ایم عمران نے بتایا کہ وزیر اعلیٰ پنجاب کی زیر نگرانی لاہور ڈویلپمنٹ اتھارٹی نے نیا پاکستان ہائوسنگ اینڈ ڈویلپمنٹ اتھارٹی کے اشتراک سے سستے رہائشی اپارٹمنٹس تعمیر کرنے کا منصوبہ بنایا اور حکومت پنجاب نے اس خواب کو تعبیر دینے کے لئے عملی طور پر اہم اور تاریخ ساز قدم اٹھا یا۔

یہپہلا موقع ہے جب پاکستان میںعام شہریوں کو رہائشی سہولتوں کی فراہمی کے لئے سرکاری محکموں اور قومی بینکوں نے ایک دوسرے سے تعاون کرنے کا فیصلہ کیا - یہ ملک بھر میں اپنی نوعیت کا پہلا منصوبہ ہے جس کے لئے سرکاری وسائل استعمال نہیں کئے جا رہے۔انہوںنے کہا کہ ایل ڈی اے سٹی نیاپاکستان اپارٹمنٹس منصوبہ پاکستان میں رہائشی مکانات کی فراہمی کے لئے ایک نئے کلچر کا نقطہ آغاز ثابت ہوگا اور اب عام شہری بھی اپنے گھروں کے مالک بن سکیں گی-ابتدائی طور پر ان اپارٹمنٹس کی لاگت کا تخمینہ تقریبا ً45لاکھ روپے فی اپارٹمنٹ لگایا گیا تھا تاہم وزیراعظم کے ویژن کے تحت کم آمدنی والے لوگوں کو یہ سہولت مہیا کرنے کے لئے ہم نے انتھک محنت کی ، اب ایک اپارٹمنٹ کی قیمت تقریباً 27لاکھ روپے ہے جو آسان ماہانہ اقساط میں وصول کی جائے گی۔

وائس چیئرمین ایس ایم عمران نے بتایا کہ ایل ڈی اے سٹی نیاپاکستان منصوبے کے تحت کل 35000تعمیر کیے جائیں گے۔پہلے مرحلے میں چارہزار رہائشی اپارٹمنٹ تعمیر کئے جارہے ہیں ۔چار منزلہ اپارٹمنٹس کی125بلاک تعمیر کئے جائیں گی-ایک بلاک32رہائشی یونٹوں پر مشتمل ہوگا۔ہر اپارٹمنٹ کا رقبہ 650 مربع فٹ ہوگا- یہ دو بیڈروم دو باتھ روم اور بالکونی پر مشتمل ہو گا- ان اپارٹمنٹس کا تعمیراتی معیار اے کیٹیگری کے قریب رکھا گیا ہے۔اپارٹمنٹس بلاکس میں ساٹھ فیصد سے زیادہ جگہ سڑکوں،گرین بیلٹس،پارکس وغیرہ کے لئے رکھی گئی ہے۔