اقلیتی عبادت گاہوں کی سکیورٹی اور تزئین و آرائش پر توجہ دی جارہی ہے ، سردار رمیش سنگھ اروڑہ

لاہور (اُردو پوائنٹ اخبارتازہ ترین - اے پی پی۔ 13 نومبر2024ء) پنجاب بھر میں اقلیتی عبادت گاہوں کی سکیورٹی آڈٹ کیلئے بدھ کے روز یہاں صوبائی وزیر اقلیتی امور سردار رمیش سنگھ اروڑہ کی زیر صدارت اعلی سطحی اجلاس منعقد ہوا۔اجلاس سے خطاب کرتے ہوئے صوبائی وزیر سردار رمیشں سنگھ اروڑہ نے کہا کہ پاکستان میں اقلیتی برادری کو برابری کے حقوق حاصل ہیں ،تمام اقلیتی عبادت گاہوں کی تازہ سکیورٹی آڈٹ رپورٹ مرتب کی جائے۔

تمام عبادت گاہوں کی چار دیواری، سکیورٹی کیمرے، خاردار تاریں اور سکیورٹی عملے کی تعیناتی یقینی بنائی جائے۔ سردار رمیش سنگھ نے کہا کہ انسانی جانوں کی حفاظت کیلئے تمام عبادت گاہوں کے داخلی و خارجی راستوں پر باڈی سرچ لازمی ہے، اقلیتی عبادت گاہوں کی سکیورٹی کے ساتھ ساتھ تزئین و آرائش پر توجہ دی جائے۔

(جاری ہے)

رمیش سنگھ اروڑہ نے کہا کہ مناسب انتظامات کیلئے تمام اقلیتی عبادت گاہوں کو قانونی طور پر رجسٹر کروانا ضروری ہے۔

سیکرٹری داخلہ پنجاب نور الامین مینگل نے صوبہ بھر میں سکیورٹی انتظامات بارے اجلاس کو بریفنگ دیتے ہوئے کہا کہ اقلیتی عبادت گاہوں کے فول پروف سکیورٹی انتظامات کیلئے فارن نیشنل سکیورٹی سیل کو متحرک کیا گیا ہے ۔پنجاب بھر میں چرچز، مندر، بیت الذکر اور گورودواروں کی شکل میں 3960 رجسٹرڈ اقلیتی عبادت گاہیں ہیں جبکہ اقلیتی عبادت گاہوں کی سکیورٹی کیلئے خصوصی سیل بھی قائم کیاگیا ہے۔

سیکرٹری داخلہ پنجاب نے کہا کہ تمام اقلیتی عبادت گاہوں کے انتظام و انصرام میں متعلقہ کمیونٹی کی اولین شمولیت لازم ہے، محکمہ داخلہ ہر دو ہفتے بعد صوبے کا سکیورٹی آڈٹ کرنے کیلئے اجلاس بلاتا ہے۔سیکرٹری داخلہ نے کہا کہ پنجاب کے تمام اضلاع میں انتظامیہ اور پولیس کی کمیٹیاں تشکیل دی ہیں جو اقلیتی برادری سے رابطے میں ہیں۔ اجلاس میں پارلیمانی سیکرٹری برائے اقلیتی امور سونیا عاشر، چیئرمین قائمہ کمیٹی فال بوس کرسٹوفر، ممبران صوبائی اسمبلی ایمانویل اطہر، اعجاز عالم اگسٹین ، شکیلہ جاوید، سیکرٹری انسانی حقوق و اقلیتی امور علی بہادر قاضی، سیکرٹری اوقاف طاہر رضا بخاری، ڈی آئی جی آپریشنز وقاص نذیر ، سالویشن آرمی علاقائی کمانڈر کرنل میکڈونلڈ، آرچ بشپ بینی ماریو ٹراواس، رومن کیتھولک چرچ لاہور ڈائیسیز، ایم قیصر چیئرمین ایف جی اے چرچ، ریورنڈ ڈاکٹر مجید ایبل، پریسبیٹیرین چرچ آف پاکستان، ریورنڈ اعزاز مارشل، چرچ آف پاکستان رائے ونڈ ڈائیسیز اور اقلیتی امور کے فوکل پرسن داد شریف سہوترا سمیت متعلقہ اداروں کے نمائندگان نے شرکت کی۔