راولپنڈی سے لاہور تک بلٹ ٹرین منصوبہ پنجاب میں ترقی کا سنگ میل ہوگا، اراکین پارلیمنٹ

اسلام آباد/لاہور(اُردو پوائنٹ اخبارتازہ ترین - این این آئی۔ 27 اپریل2025ء)قومی اور پنجاب اسمبلی کے اراکین نے صوبائی حکومت کے راولپنڈی سے لاہور تک بین الاقوامی معیار کے بلٹ ٹرین منصوبے کو اہم قرار دیتے ہوئے کہا ہے کہ یہ منصوبہ پنجاب کی ترقی کا سنگ میل ثابت ہوگا۔تفصیلات کے مطابق ملک کی تاریخ میں یہ پہلا موقع ہے کہ راولپنڈی سے لاہور تک بین الاقوامی معیار کی بلٹ ٹرین منصوبے کا آغاز کیا جا رہا ہے، جس کے تحت راولپنڈی سے لاہور تک بلٹ ٹرین کا منصوبہ پنجاب کی ترقی میں سنگ میل ثابت ہوگا۔

ارکان قومی اور صوبائی اسمبلی اور سینیٹ کے اراکین نے کہا کہ پنجاب کی ترقی پاکستان کی ترقی ہے، نواز شریف کا ویژن تھا کہ پاکستان میں بلٹ ٹرین منصوبے کا آغاز کیا جائے۔ اس بارے میں سینئر وزیر مریم اورنگزیب اور وفاقی وزیر ریلوے حنیف عباسی نے اس عظیم منصوبے کی تکمیل کیلئے ممکنہ طور پر اپنا ہوم ورک مکمل کرلیا ہے۔

(جاری ہے)

انہوںنے کہاکہ جلد اس منصوبے کا سنگ بنیاد وزیر اعظم شہباز شریف رکھیں گے، یہ منصوبہ ترقی کے ایک نئے دور کا آغاز ہوگا۔

سابق سنیٹر چوہدری تنویر خان نے کہاکہ جب بھی پاکستان مسلم لیگ (ن)اقتدار میں آتی ہے ملک ترقی کی راہ پر گامزن ہوجاتا ہے۔انہوں نے کہا کہ دنیا جدت کی طرف گامزن ہے۔مسلم لیگ (ن) کی رکن قومی اسمبلی نزہت صادق نے کہاکہ مریم نواز نے پنجاب کو ترقی یافتہ صوبہ بنا دیا ہے۔ سنیٹر ناصر محمود بٹ نے کہا کہ دنیا ٹرانسپورٹ کے جدید نظام سے ترقی کرتی ہے، بلٹ ٹرین منصوبے اس کی ایک روشن مثال ہے۔

رکن قومی اسمبلی بیرسٹر دانیال چوہدری نے کہاکہ بلٹ ٹرین سے وقت کی بچت کے ساتھ ساتھ عوام کو معیاری ٹرانسپورٹ کی سہولت میسر ہوگی۔اسی طرح رکن صوبائی اسمبلی ملک افتخار نے کہا کہ راولپنڈی سے لاہور تک بلٹ ٹرین منصوبہ عوام کی تقدیر کو بدل دے گا۔مسلم لیگ(ن)کے سینئر رہنما حاجی پرویز نے کہاکہ بلٹ ٹرین کے منصوبے کی تکمیل سے فیول اور وقت کی بچت ہوگی۔