میری وجہ شہرت ڈرامہ سیریل ’’ تنہائیاں ‘‘ تھی ‘ مرینہ خان

خدا کا شکر ہے میری اداکاری کی طرح ڈائریکشن کو بھی پسند کیا گیا‘ انٹر ویو

ہفتہ 28 نومبر 2020 12:04

میری وجہ شہرت ڈرامہ سیریل ’’ تنہائیاں ‘‘ تھی ‘ مرینہ خان

لاہور (اُردو پوائنٹ اخبارتازہ ترین - این این آئی۔ 28 نومبر2020ء) اداکارہ و ڈرامہ ڈائریکٹر مرینہ خان نے کہا ہے کہ میری وجہ شہرت ڈرامہ سیریل ’’ تنہائیاں ‘‘ تھی جس سے مجھے ملک گیر ملی ، اداکاری کی طرح ڈائریکشن کو بھی پسند کیا گیا ۔ انہوں نے ایک انٹرویو کے دوران کہا کہ میرا شوبز میں آنے کا کوئی ارادہ نہیں تھا ، میری ایک دوست کہکشاں پہلے ہی ٹی وی پر کام کر رہی تھی اور میں اس کے ساتھ ٹی وی سٹوڈیو جایا کرتی تھی انہی دنوں شہزاد خلیل ڈرامہ سیریل ’’ تنہائیاں ‘‘ کے آڈیشن لے رہے تھے اور مجھے بھی ڈرامہ سیریل میں کاسٹ کر لیا گیا ۔

(جاری ہے)

اس سے قبل میں نشان حیدر کے حوالے سے ایک ڈرامہ’’ راشد منہاس ‘‘ کر چکی تھی ۔ انہوں نے کہا کہ ڈرامہ سیریل ’’ تنہائیاں ‘‘ آن ائیر ہونے سے ایک روز قبل ہی مجھے بہروز سبزواری نے آگاہ کر دیا تھا کہ کل سے تمہاری زندگی بدل رہی ہے اور پھر ایسا ہی ہوا ۔ انہوں نے کہا کہ میرے سفید بال میری پہچان کا حصہ بن چکے ہیں ، 90کی دہائی میں جب میں بالکل نوجوان تھی تو اس وقت ہی میرے بال سفید ہونا شروع ہو گئے تھے۔ انہوں نے کہا کہ بطور ڈائریکٹر میں نے ’’ ڈولی کی آئے گی بارات ‘‘ سمیت دیگر میں ڈائریکشن دی ہے اور خدا کا شکر ہے کہ میری اداکارہ کی طرح میری ڈائریکشن کے انداز کو بھی پسند کیا گیا ۔