سدرن پنجاب نے ناردرن کے مضبوط بالنگ اٹیک کے سامنے گھٹنے ٹیک دئیے

لاہور(اُردو پوائنٹ اخبارتازہ ترین - این این آئی۔ 14 اکتوبر2019ء) اقبال اسٹیڈیم فیصل آباد میں کھیلے گئے پہلے میچ میں ناردرن نے سدرن پنجاب کو 5 وکٹوں سے شکست دیدی۔ فاتح ٹیم کی جانب سے سہیل تنویر اور محمد عامر نے مجموعی طور پر5 کھلاڑیوں کو آئوٹ کیا جبکہ اوپنر عمر امین نے نصف سنچری اسکور کی۔ مڈل آرڈربیٹسمین آصف علی کی جارحانہ اننگز نے جیت میں اہم کردار ادا کیا۔

ناردرن نے 136اسکور کا ہدف 5 وکٹوں کے نقصان پر 19 اوور زمیں حاصل کرلیا۔نیشنل ٹی ٹونٹی کپ فرسٹ الیون ٹورنامنٹ کے پہلے میچ میں سدرن پنجاب کے کپتان شان مسعودنے ٹاس جیت کر پہلے بیٹنگ کا فیصلہ کیا۔محمد عامر، سہیل تنویر، عماد وسیم اور شاداب خان کی موجودگی میں ناردرن کی مضبوط بالنگ لائن اپ کے سامنے سدرن پنجاب کی اننگز کا آغاز متاثرکن نہ رہا اور 79 رنز پر 6کھلاڑی پویلین واپس لوٹ گئے۔

(جاری ہے)

جس کے بعد آلرانڈر عامر یامین نے کریز سنبھالی اور 4 چوکوں کی مدد سے 33 رنز بنا کر ٹیم کامجموعہ 135 تک پہنچانے میں مدد ی۔ صہیب مقصود کے 25 اور وہاب ریاض کے 16 رنز کی بدولت سدرن پنجاب نے مقررہ 20 اوورز میں 9وکٹوں کے نقصان پر 135 رنز بنائے۔ناردرن کی جانب سے سہیل تنویر نے 27 رنز کے عوض 3 جبکہ محمد عامر نے 19 رنز کے عوض 2 کھلاڑیوں کو پویلین کی راہ دکھائی۔

شاداب خان اور محمد نواز نے بھی 1،1 کھلاڑی کو آئوٹ کیا۔جواب میں ناردرن کی جانب سے بھی اننگز کا آغاز متاثر کن نہ رہا اور محض 17 رنز پر 2 کھلاڑی پویلین واپس لوٹ چکے تھے۔جس کے بعد اوپنر عمر امین نے آلرانڈر محمد نواز کے ہمراہ ذمہ دارانہ کھیل کا مظاہرہ کیا۔ دونوں کے درمیان 63رنزکی شراکت نے میچ میں ناردرن کی پوزیشن مستحکم کردی۔ عمرا مین41 گیندوں پر 50 رنز بنا کر آئوٹ ہوئے۔

ان کی اننگز میں 4 چوکے اور 2 چھکے شامل تھے۔ محمد نواز نے 24 ر نز بنائے تاہم مڈل آرڈر بیٹسمین آصف علی نے اختتامی اوورز میں 24 گیندوں پر 44 رنز بنا کر جیت میں اہم کردار ادا کیا۔ آصف علی کی جارحانہ اننگز میں 3 چوکے اور 3 چھکے شامل تھے۔ناردرن نے مطلوبہ ہدف6 گیندوں قبل 5 وکٹوں کے نقصان پر حاصل کرلیا۔سدرن پنجاب کی جانب سے دراز قد فاسٹ بالر محمد عرفان اور اسپنر زاہد محمود 2،2 کھلاڑیوں کو آئوٹ کیا۔ایونٹ میں پیر کے روز 2 میچز کھیلے جائیں گے۔ پہلے میچ میں ناردرن اور سنٹرل پنجاب جبکہ دوسرے میچ میں خیبرپختونخوا اور سدرن پنجاب کی ٹیمیں مدمقابل ہوں گی۔