نیشنل گیمز میں پاکستان ریلوے نے 50 سال کے طویل عرصے کے بعد تیسری پوزیشن حاصل کی،شاہد عزیز

لاہور۔19 نومبر(اُردو پوائنٹ اخبارتازہ ترین - اے پی پی۔ 19 نومبر2019ء) پاکستان ریلوے نے 50 سال کے طویل عرصے کے بعد نیشنل گیمزمیں تیسری پوزیشن حاصل کی ہے۔ یہ تاریخی کامیابی 33ویں نیشنل گیمز میں 1815پوائنٹس لے کر حاصل کی گئی۔ ان خیالات کا اظہار صدر پاکستان ریلوے سپورٹس بورڈ و جنرل منیجر ڈبلیو اینڈ ایس آئی شاہد عزیز نے ریلوے گڑھی شاہو سٹیڈیم میں میڈیا سے گفتگوکرتے ہوئے کیا۔

یہ پریس کانفرنس پاکستان ریلوے کی تیسری پوزیشن لینے کے بعد صدر پاکستان ریلوے سپورٹس بورڈشاہد عزیز اور نائب صدر پاکستان ریلوے سپورٹس بورڈ حمدان نذیرنے یہ مشترکہ طور پر کی۔ انہوں نے کہا کہ 2013میں نیشنل گیمز میں ریلوے کی ساتویںپوزیشن تھی جب میں نے چارج سنبھالا تومیںنے اپنی انتظامیہ اور کھلاڑیوںکو ہدایات کیں کہ اس دفعہ ہم نے وکٹری سٹینڈ پر آنے کی پوری کوشش کرنی ہے۔

(جاری ہے)

جس پر پچھلے تین ماہ سے میری ٹیم دن رات محنت کررہی تھی۔ انہوں نے مزید کہا کہ نیشنل گیمز میں 14 ٹیموں نے حصہ لیاجس میں ریلوے کی تیسری پوزیشن ہے۔ اس دفعہ ہم نے 12گولڈ میڈل ، 20سلور میڈل اور 73برانز میڈل جیتے ہیں۔کل 108میڈلز پاکستان ریلوے کی ٹیم نے حاصل کئے ہیں۔یہ سارا کچھ انتظامیہ اور کھلاڑیوں کی محنت سے ممکن ہوا۔اس کامیابی پر میں اپنی انتظامیہ اور ٹیم کا بے حد شکرگزار ہوں۔

انہوں نے کہا کہ اس کامیابی کوہم واپڈا اور آرمی کے مقابلے میں بہت کم بجٹ میں ممکن بنایا۔ ان نیشنل گیمز میں کشتی رانی ، ویٹ لفٹنگ ،کراٹے، تیک وانڈو، ٹیبل ٹینس، راسہ کشی، ہاکی،باڈی بلڈنگ، باکسنگ ، سائیکلنگ، خواتین کیلئے رگبی،جمناسٹک اور کُشتی کے مقابلے شامل تھے۔ پاکستان ریلوے کی ٹیم نے کشتی رانی میں سب سے زیادہ تمغے حاصل کئے ہیں۔