پی ٹی آئی ملتان کے نومنتخب رکن پنجاب اسمبلی غلام عباس کھاکھی انتقال کر گئے

مرحوم کی نئے پاکستان کیلئے جدوجہد کو فراموش نہیں کیا جاسکتا ،ْ شاہ محمود قریشی

بدھ 15 اگست 2018 13:47

پی ٹی آئی ملتان کے نومنتخب رکن پنجاب اسمبلی غلام عباس کھاکھی انتقال کر گئے

ملتان (اُردو پوائنٹ اخبارتازہ ترین - این این آئی۔ 15 اگست2018ء) ملتان سے تحریک انصاف کے نومنتخب رکن پنجاب اسمبلی غلام عباس کھاکھی انتقال کر گئے ،ْغلام عباس کھاکھی دل کے عارضے میں مبتلا تھے۔ میڈیا رپورٹ کے مطابق ملتان کے حلقہ پی پی 222 جلال پور پیر والا سے پاکستان تحریک انصاف کے نومنتخب ایم پی اے غلام عباس کھاکھی حرکت قلب بند ہو جانے سے انتقال کر گئے ۔

(جاری ہے)

پی ٹی آئی رہنما شاہ محمود قریشی نے غلام عباس کھاکھی کے انتقال پر افسوس کا اظہار کرتے ہوئے اپنے ٹوئیٹر پیغام میں کہا کہ مرحوم کی نئے پاکستان کیلئے جدوجہد کو فراموش نہیں کیا جاسکتا ،ْ اللہ ان کی مغفرت کرے اور انہیں جنت الفردوس میں اعلیٰ مقام عطا فرمائے۔ یاد رہے کہ غلام عباس کھاکھی کو چند روز قبل دل کا دورہ پڑا جس کے بعد وہ اسلام آباد کے ہسپتال میں زیر علاج تھے ۔مرحوم کی عمر 60 برس تھی ،ْ انہوں نے سوگوران میں 2 بیوائیں ، 3 بیٹے اور 1 بیٹی کو چھوڑا ہے ۔غلام عباس کھاکھی 1993ء سے الیکشن میں حصہ لے رہے تھے، انہوں نے جماعت اسلامی ،ْپیپلز پارٹی اور آزاد حیثیت سے الیکشن لڑے، تاہم وہ پہلی بار منتخب ہو کر صوبائی اسمبلی پہنچے تھے۔