کمشنرملتان کا تحصیل شجاع آباد کا دورہ، شہر، ہسپتال اورتعلیمی اداروں کا معائنہ

ملتان(اُردو پوائنٹ اخبارتازہ ترین - اے پی پی۔ 18 اکتوبر2019ء) کمشنر ملتان ڈویژن افتخار علی سہو نے اچانک تحصیل شجاع آباد کا دورہ کیا،دورہ کے دوران انہوں نے شہر میں صفائی کی حالت بہتر بنانے اور ٹوٹی سڑکوں پر پیچ ورک کروانے،کریانہ سٹوز پر سرکاری نرخ پینافلکس پر آویزاں کرنے اور تجاوزات کے خلاف آپریشن کی ہدایت کی۔انہوں نے تحصیل ہسپتال شجاع آباد کا بھی دورہ کیا اور وارڈز، ادویات کے سٹورز کا بھی جائزہ لیا۔

انہوں نے مریضوں سے ہسپتال میں دستیاب سہولیات بارے دریافت کیا۔شجاغ آباد پارکس کے دورے کے موقع پر انہوں نے اسسٹنٹ کمشنر ڈاکٹر عابدہ فرید کے کام کو سراہتے ہوئے پارکس میں جاگنگ ٹریک بنانے کی بھی ہدایت کی۔ انہوں نے کہا کہ عوام کو تفریح کی معیاری سہولیات دینے کیلئے پارکس کو بہتر بنانا بہت ضروری ہے۔

(جاری ہے)

بعدازاں کمشنر افتخار علی سہو اور اسسٹنٹ کمشنر نے پارک میں پودے لگا کر ملکی ترقی کیلئے دعا کی۔

کمشنر افتخار سہو نے تدریسی عمل کی جانچ کیلئے گرلز، بوائز سیکنڈری سکول اور کالجوں کا بھی دورہ کیا۔ اس موقع پر انہوں نے غیر حاضر اساتذہ کی لسٹ منگواکر اسسٹنٹ کمشنر کو تصدیق کرنے کی ہدایت کی۔انہوں نے طلبہ سے مختلف سوالات کیے اور انسدادِ ڈینگی مہم بارے لیکچر بھی دیا۔ انہوں نے شجاع آباد اراضی ریکارڈ سنٹر کے دورے کے موقع پر سنٹر میں خواتین کے کاؤنٹر اور انتظارگاہیں مختص کرنے کا حکم دیا۔ انہوں نے کہا کہ کرپٹ مافیا کو نشان عبرت بنائیں گے، اسسٹنٹ کمشنرز سے پٹواریوں بارے رپورٹ طلب کی جاچکی ہے۔بعدازاں کمشنر نے شہریوں سے سنٹرمیں دستیاب سہولیات اور مسائل بارے بھی دریافت کیا۔