ٹیکساس سے تعلق رکھنے والی 16 سالہ لڑکی کا قد 6 فٹ 9 انچ تک پہنچ گیا

ٹیکساس(اُردو پوائنٹ اخبارتازہ ترین - این این آئی۔ 18 ستمبر2019ء) امریکی ریاست ٹیکساس سے تعلق رکھنے والی 16 سالہ لڑکی کا قد 6 فٹ 9 انچ تک پہنچ گیا،میسی کیورین کا قد پیدائش کے وقت صرف 19 انچ تھا مگر اب 16 سال کی عمر میں یہ لڑکی 6 فٹ 9 انچ قد کی مالک بن چکی ہے۔امریکی ریاست ٹیکساس سے تعلق رکھنے والی یہ لڑکی درحقیقت اس وقت دنیا کی سب سے لمبی ٹانگوں کے ریکارڈ کو بھی توڑ چکی ہے۔

امریکی ٹی وی کے مطابق میسی کیورین کی ٹانگون کی لمبائی 53 انچ ہے جبکہ سابقہ ریکارڈ روس سے تعلق رکھنے والی ایکاٹیرنیا لیسینا کے پاس تھا جن کی ٹانگوں کی لمبائی 52.2 انچ تھی۔ابھرتی ہوئی ماڈل میسی کو اکثر چلتے ہوئے بہت خیال رکھنا پڑتا ہے تاکہ وہ دروازے سے ٹکرا نہ جائیں۔میسی کی 55 سالہ والدہ ٹریسی نے بارکرافٹ ٹی وی سے بات کرتے ہوئے بتایا کہ مجھے احساس ہوا تھا کہ 18 ماہ کی عمر میں میری بیٹی دیگر بچوں کے مقابلے میں لمبی ہے اور اس وقت اس کا قد 2 فٹ 11 انچ ہوچکا تھا۔

(جاری ہے)

انہوں نے مزید بتایا کہ اس دور میں وہ دیگر ننھی بچیوں کے ساتھ کھڑی تھی تو وہ 2 سال کی بجائے زیادہ عمر کی لگ رہی تھی۔4 یا 5 سال کی عمر میں اس کا قد ہر سال 5 انچ بڑھا جو کہ بہت زیادہ تھا جیسا ٹریسی بتاتی ہیں اس کی ٹانگیں ہمیشہ سے بہت لمبی تھیں، میں یہ کہنے کی عادی ہوگئی تھی کہ کبھی میری بھی ٹانگیں لمبی تھیں مگر اب ایسا نہیں۔ویسے طویل قد میسی کے جینز میں موجود ہے، اگرچہ ان کی والدہ کا قد 5 فٹ 7 انچ ہے مگر ان کے والد کیمرون 6 فٹ 5 انچ جبکہ 17 سالہ بھائی جیکب 6 فٹ 3 انچ کا ہے۔اگرچہ اب میسی کو اپنے قد پر فخر ہے مگر وہ کہتی ہے کہ شکر ہے کہ قد بڑھنا رک گیا، کم از کم کچھ وقت کے لیے تو۔