سیکرٹریٹ الیمنٹری اینڈ سکینڈری ایجوکیشن آزاد کشمیر نے محکمہ کے تمام تدریسی و انتظامی افسران و اہلکاران کیلئے اپنے بچوں کو سرکاری تعلیمی ادارہ جات میں داخل کروانا لازمی قرار دیدیا

منگل 23 جولائی 2019 19:54

مظفرآباد(اُردو پوائنٹ اخبارتازہ ترین - این این آئی۔ 23 جولائی2019ء) سیکرٹریٹ الیمنٹری اینڈ سکینڈری ایجوکیشن آزاد حکومت ریاست جموں وکشمیر نے محکمہ کے تمام تدریسی و انتظامی آفیسران و اہلکاران کے لیے اپنے بچوں کو سرکاری تعلیمی ادارہ جات میں داخل کروانا لازمی قرار دیدیا اور محکمہ کے جملہ آفیسران ، معلمین و معلمات جملہ کیڈر تدریسی و انتظامی سٹاف کی ترقیابیوں ، ٹائم سکیل، قریبی سٹیشن پر تبادلہ جات ، رخصت ، جی پی ایف ریفنڈ، این او سی ، قرضہ تعمیر مکان وغیرہ جیسی جملہ مراعات کو اپنے بچوں کی سرکاری تعلیمی ادارہ جات میں تدریس سے منسلک کردیا ہے۔

جن اساتذہ کے بچے پرائیویٹ ادارہ جات میں زیر تعلیم ہوں گے وہ ماسوائے تنخواہ ودیگر مراعات حاصل نہ کرسکیں گے۔اس سلسلہ میں سیکرٹریٹ الیمنٹری اینڈ سکینڈری ایجوکیشن کی جانب سے باقاعدہ پالیسی سرکلر جاری کردیا گیا ہے۔

(جاری ہے)

محکمہ کے جملہ انتظامی آفیسران کو ہدایت کی گئی ہے کہ وہ جملہ محکمہ کے تدریسی و غیر تدریسی عملے کے کیسز برائے ترقیابیاں ، ٹائم سکیل، جی پی ایف ریفنڈ، قرضہ تعمیر مکان ، قر یبی سٹیشن پر تبادلہ، رخصت ، این او سی ودیگر الائونسز کے ہمراہ اس امر کا سرٹیفکیٹ بھی فراہم کریں کہ ان مدرسین کے بچے کسی پرائیویٹ ادارے میں زیر تعلیم نہ ہیں۔

غلط سرٹیفکیٹ/ تصدیق فراہم کرنے والے انتظامی آفیسران کے خلاف ریموول فرام سروس (سپیشل پاورز )ایکٹ 2001؁ء کے تحت انضباطی کارروائی عمل میں لائی جائے گی۔