حکومت آزادجموں وکشمیرنے قرآن پاک کی تعلیم کو تعلیمی نصاب کا لازمی حصہ بنادیا‘ دی آزادجموں وکشمیر کمپلسری ٹیچنگ آف دی ہولی قرآن ایکٹ، 2019اتفاق رائے سے منظور

جمعہ 13 دسمبر 2019 23:38

مظفر آباد ۔ (اُردو پوائنٹ اخبارتازہ ترین - اے پی پی۔ 13 دسمبر2019ء) حکومت آزادجموں وکشمیرنے قانون سازی کے شعبہ میں ایک اور سنگ میل عبور کرتے ہوئے قرآن پاک کی تعلیم کو تعلیمی نصاب کا لازمی حصہ بنادیا۔ جمعہ کے روز آزادجموں وکشمیر قانون ساز اسمبلی کے ڈپٹی سپیکر سردار عامر الطاف کی زیر صدارت اجلاس میں دی آزادجموں وکشمیر کمپلسری ٹیچنگ آف دی ہولی قرآن ایکٹ، 2019اتفاق رائے سے منظور کر لیا گیا۔

(جاری ہے)

نئی قانون سازی کے متعلق وزیر قانون و پارلیمانی امور سردار فاروق احمد طاہر نے ایوان کو بتایا کہ پرائمری تک ناظرہ کو اور ایف اے /ایف ایس سی تک ترجمہ کے ساتھ قرآن کی تعلیم کو لازمی قراردیاگیا ہے ۔ وزیر قانون نے کہاکہ بارہویں اور تیرہویں آئینی ترمیم کے بعد ن لیگ کی موجودہ حکومت کا آج قانون سازی کا تیسرا بڑا تاریخی اور مبارک کام ہے ۔ انہوں نے کہاکہ اس سے قبل قادیانیوں کو کافر قرار دینے، تحفظ ناموس رسالت پر قانون سازی کا کریڈٹ بھی موجودہ حکومت کو جاتا ہے ۔ قرآن پاک کے تقدس کے حوالے سے ممبر اسمبلی سردار محمد صغیر خان کے نکتہ پر وزیر قانون نے کہاکہ قرآن پاک کے تقدس کے حوالے سے تعلیمی اداروں میں تمام ضروری لوازمات کو یقینی بنایا جائیگا۔