مظفرگڑھ، کوئی سائل اپنے کام کے سلسلے میں کسی سرکاری ملازم کو رشوت کے طور پر ایک روپیہ بھی نہ دے ،ڈپٹی کمشنر سید موسیٰ رضا

مظفرگڑھ۔22اکتوبر  (اُردو پوائنٹ اخبارتازہ ترین - اے پی پی - اے پی پی۔ 22 اکتوبر2021ء) :ڈپٹی کمشنر سید موسیٰ رضا نے مظفرگڑھ کے نواحی علاقے شاہ جمال میں کھلی کچہری میں سائلین سے خطاب کرتے ہوئے کہا کہ کوئی سائل اپنے کام کے سلسلے میں کسی سرکاری ملازم کو رشوت کے طور پر ایک روپیہ بھی نہ دے اگر کوئی ملازم یا اہلکار رشوت طلب کرتا ہے تو میرے پاس آئے اگر اس کا کام میرٹ پر ہوگا تو اس کا مسئلہ حل کرانے کی ذمہ داری میری ہوگی۔

کھلی کچہری میں ایم پی اے عون حمید ڈوگر، ڈی پی او حسن اقبال، اسسٹنٹ کمشنرعابدہ فرید بھی موجود تھیں۔ ڈپٹی کمشنر نے کہا کہ حکومت پنجاب کی ہدایت کی مطابق عوامی نمائندوں کے ہمراہ ضلع بھر میں کھلی کچہریاں لگائی جائیں گی جہاں ایک جگہ پر ہی تمام مسائل نہ صرف سنے جائیں گے بلکہ ان کے فوری حل کیلئے بھی اقدامات بھی کئے جائیں گے۔

(جاری ہے)

انہوں نے کہا کہ اپنے ماتحت اداروں کے افسران اور اہلکاروں کو بھی ہدایت کردی گئی ہے کہ اگرکسی نے کسی شہری کے ساتھ کوئی زیادتی کی تو وہ سروس میں نہیں رہے گا، انہوں نے کہا کہ ہم نے کالی بھیڑوں کو نکالنا ہے اور اچھا کام کرنے والوں کی حوصلہ افزائی کرنا ہے۔

انہوں نے مزید کہا کہ عوامی مسائل کے حل کیلئے میرے دفتر کے دروازے کھلے ہیں۔ روزانہ صبح 10سے 12بجے تک عوامی مسائل سنے جاتے ہیں اور ان کے حل کیلئے متعلقہ اداروں کے افسران کو ہدایت کی جاتی ہے۔ کھلی کچہری سے خطاب کرتے ہوئے ڈی پی او حسن اقبال نے کہا کہ اب دفتر میں بیٹھ کر سب اچھا  ہے کی رپورٹ سے کام نہیں چلے گا اب افسران کو باہر نکل کر عوام کے مسائل حل کرنا ہیں، عوامی مسائل کے حل کیلئے محکمہ پولیس اور انتظامیہ کے افسران مل کر کام کریں گے اور ہفتہ وار ضلع کے مختلف مقامات پر کھلی کچہری لگائیں گے۔