مظفرگڑھ،ڈکیتی،چوری کی وارداتوں میں مطلوب ملزم گرفتار

مظفرگڑھ7 جنوری  (اُردو پوائنٹ اخبارتازہ ترین - اے پی پی - اے پی پی ۔07 جنوری2022ء) :تھانہ دائرہ دین پناہ پولیس کی جانب سے دوران گرفتاری ملزم کے برہنہ ہونے کی ویڈیو وائرل ہونے کا معاملہ پر ڈی پی او مظفرگڑھ نے نوٹس لیتے ہوئے ڈی ایس پی کوٹ ادو سعادت علی کو انکوائری کا حکم دے کر رپورٹ طلب کر لی۔پولیس ترجمان کے مطابق  دوران گرفتاری بنائی گئی تمام ویڈیوز کا ریکارڈ اکٹھا کیا جا رہا ہے، ویڈیوز کا ہر اینگل سے تجزیہ کیا جا رہا ہے۔

پولیس ترجمان کے مطابق رپورٹ کے  بعد زیادتی ثابت ہونے کی صورت میں پولیس اہلکاروں کے خلاف کارروائی کی جائے گی۔یاد رہے کہ مظفرگڑھ کی تحصیل کوٹ ادو کے تھانہ دائرہ دین پناہ کے ایس ایچ او انسپکٹر مختیار نے مخبر کی اطلاع پر  پولیس ٹیم کے ہمراہ چھاپہ مار کر متعدد ڈکیتیوں اور چوریوں میں مطلوب ملزم مزمل مشوری کو گرفتار کیا تھا،پولیس تھانہ دائرہ دین پناہ نے ملزم مزمل مشوری کے خلاف 6 مقدمات کی فہرست جاری کی ہے اور کہا ہے کہ وہ چوروں اور ڈکیتوں کے گینگ کا سرغنہ ہے اس کے گینگ کے دیگر ممبران عدنان ،ندیم ،دلاور ،کامران،رمضان، جاوید اور دلی گرمانی ہیں۔

(جاری ہے)

پولیس ذرائع نے بتایا کہ مزمل کی گرفتاری کے دوران اس کا ساتھی رمضان 2 ساتھیوں سمیت اسلحہ لہراتے ہوئے فرار ہو گیا،ملزم کو کسی پولیس اہلکار نے برہنہ نہیں کیا بلکہ ملزم کی گرفتاری کے وقت ملزم،اس کے  والد اور بھائی کی شدید مزاحمت کی وجہ سے ملزم کے کپڑے پھٹ گئے تھے۔