اورکزئی، محرم الحرام کے دوران تخریب کاری کے دو بڑے منصوبے ناکام، بڑی مقدار میں اسلحہ بارود برآمد

پیر 31 اگست 2020 16:47

اورکزئی (اُردو پوائنٹ اخبارتازہ ترین - اے پی پی۔ 31 اگست2020ء) محرم الحرام کے دوران لوئر اورکزئی میں تخریب کاری کے دو بڑے منصوبے ناکام، بڑی مقدار میں اسلحہ بارود برآمد کرکے ملزم کو گرفتار کرلیا گیا۔ اس حوالے سے ڈسٹرکٹ پولیس آفیسر ضلع اورکزئی نثار احمد خان نے لوئر اورکزئی کلایہ ڈی ایس پی آفس میں پریس کانفرنس کے دوران برآمد کیا گیا اسلحہ میڈیا کو دکھاتے ہوئے کہا کہ خفیہ اطلاع پر فیروز خیل پہاڑی میںڈی ایس پی لوئر اورکزئی محبوب خان نے پولیس پارٹی کے ہمراہ سرچ آپریشن کے دوران زیر زمین چھپایا گیا اسلحہ برآمد کیا گیا۔

برآمد کئے گئے اسلحے میں 6مارٹر گولے اورایک اینٹی ایئرکرافٹ مشین گن جو بااکل تازہ اور چالو حالت میں تھا برآمد کرلئے گئے جبکہ ایک دن قبل ضلع خیبر کے علاقہ تیراہ میدان سے براستہ اورکزئی کارتوس اور بارود سمگل کرنے کی کوشش کی جارہی تھی، ڈی ایس پی محبوب خان نے چمن جنہ کے مقام پر ناکہ بندی کے دوران کار کے خفیہ خانوں سے 17سو کارتوس اور تین پیکٹ بارود برآمد کرکے ملزم کو گرفتار کر لیا۔

(جاری ہے)

ڈی پی او نثار احمد خان نے کہا کہ اس برآمد کئے گئے اسلحے اور بارود سے ضلع اورکزئی سمیت کہیں بھی نویں اور دسویں محرم الحرام کو تخریب کاری ہو سکتی تھی۔ ڈی پی او نثار احمد خان نے ڈی ایس پی محبوب خان اور ان کے ٹیم کو شاباش دی اور انعامات سے بھی نوازا ۔