آل گورنمنٹ ایمپلائز گرینڈ الائنس ضلع قصور کے زیر اہتمام مہنگائی میں پسے ہوئے درجنوں سرکاری ملازمین کا اپنے مطالبات کے حق میں ریلی

پتوکی (اُردو پوائنٹ اخبارتازہ ترین - آن لائن۔ 02 جون2023ء) آل گورنمنٹ ایمپلائز گرینڈ الائنس ضلع قصور کے زیر اہتمام مہنگائی میں پسے ہوئے درجنوں سرکاری ملازمین نے اپنے مطالبات کے حق میں ریلی نکالی اور کچہری چوک میں احتجاج کیا ملازمین نے اپنے مطالبات کے حق میں نعرے لگائے۔کچہری چوک میں آل گورنمنٹ ایمپلائز گرینڈ الائنس ضلع قصور کے رہنماؤں شیر محمد میو، محمد یوسف ندیم، میاں شہزاد منور، میڈم کوثر عزیز، پروفیسر مدثر حسین،شبیر گل، محمد علی تبسم، و دیگر رہنماؤں نے خطاب کرتے ہوئے کہا کہ دو دن پہلے پارلیمنٹ ہاؤس کے ملازمین کی تنخواہوں میں 100 فیصد کر دیا گیا ہے۔

اب سرکاری ملازمین کے صبر کا پیمانہ لبریز ہو چکا ہے۔ ہمارا مطالبہ ہے کہ تنخواہ اور پینشن میں 100 فیصد رننگ بیسک پے میں اضافہ کیا جائے اور ہاؤس رینٹ، کنوینس الاؤنس، میڈیکل الاؤنس کو موجودہ پے سکیل کی رننگ بیسک پر دیا جائے سرکاری ملازمین مہنگائی کی وجہ سے انتہائی پریشان ہیں ریاست اپنے ملازمین کے بارے میں سوچے۔

(جاری ہے)

پچھلے سال مرکزی کابینہ نے وعدہ کیا تھا کہ پے اینڈ پینشن کمیشن کی سفارشات پر من و عن عملدرآمد کیا جائے گا۔

لیکن آج تک عملدرآمد نہیں ہوا۔ سرکاری ملازمین کے تمام الاؤنسز 2008 کی پے پر منجمند ہیں اور مہنگائی میں کئی گنا اضافہ ہو چکا ہے۔ دوسری طرف سرکاری ملازمین کی ایگزیکٹو کلاس کو 150٪ ایگزیکٹو الاؤنس رننگ بیسک پے پر دیا جارہا ہے جبکہ عام سرکاری ملازمین کو صبر کی تلقین اور آئی ایم ایف کی منظوری سے مشروط کیا جا رہا ہے۔ اگر ہمارے مطالبات تسلیم نہ کیے گئے تو 8 جون کو پاکستان بھر کے لاکھوں سرکاری ملازمین پارلیمنٹ ہاؤس اسلام آباد کے سامنے احتجاجی دھرنا دیں گے جو مطالبات کی منظوری تک جاری رہے گا۔

اگیگا رہنماؤں نے مزید کہا کہ اس ملک کی بقا پاک فوج سے ہے۔ پوری دنیا کی غیر مسلم طاقتیں پاک فوج کو کمزور کرنا چاہتی ہیں لیکن پاکستان کے عوام اور سرکاری ملازمین اپنی عظیم فوج کے ساتھ ہیں۔ اگیگا واضح کرنا چاہتی ہے کہ ہمارا کوئی سیاسی ایجنڈہ نہیں ہے۔ سرکاری ملازمین کا یہ اتحاد خالصتا غیر سیاسی ہے۔