ملٹی سیکٹرول ایپروچ کے ذریعے ہی صوبے میں مختلف قسم کے وبائی امراض پر قابو پانے میں کامیابی ممکن ہے،ڈاکٹرارشدخان ڈی جی ہیلتھ سروسز خیبرپختونخوا

پشاور(اُردو پوائنٹ اخبارتازہ ترین - این این آئی۔ 22 نومبر2019ء) خیبر پختونخوا کے ڈائریکٹر جنرل ہیلتھ سروسز ڈاکٹر ارشد خان نے کہا ہے کہ ملٹی سیکٹرول ایپروچ کے ذریعے ہی صوبے میں مختلف قسم کے وبائی امراض پر قابو پانے میں کامیابی ممکن ہے۔ انہوں نے کہا ماضی میں کسی وبا یا ایمرجنسی صورت حال سے نمٹنے کیلئے محکمہ صحت ہی کو ذمہ دار ٹھہرایا جاتا تھاجس کے نتیجے میں محکمہ صحت کو اپنی استعداد سے زیادہ بوجھ اٹھانا پڑتا تھا اور اکثر مسائل کا سامنا کرنا پڑتا۔

ان خیالات کا اظہار ڈاکٹر ارشد خان نے ملٹی سیکٹرول ایپروچ کے تحت صوبائی ریپیڈ رسپانس ٹیم کی پانچ روزہ ٹریننگ کے حوالے سے منعقدہ تربیتی ورکشاپ کے اختتامی تقریب سے خطاب کرتے ہوئے کیا۔ ڈاکٹر ارشد خان نے کہا کہ صوبے میں ریپڈ رسپانس ٹیم کے لئے ٹریننگ کا انعقاد ایک قابل تحسین اقدام ہے اور صوبائی سطح کے ساتھ ساتھ اسکو اضلاع کی سطح پر لے کے جائیں گے تاکہ مختلف وباؤں سے بہتر طور پر نبردآزما ہوسکے۔

(جاری ہے)

اس موقع پر ایڈیشنل ڈی جی ہیلتھ ڈاکٹر ہارون، ڈائریکٹر پبلک ہیلتھ ڈاکٹر جمال اکبر اور دیگر متعلقہ حکام بھی ان کے ہمراہ تھے۔ ٹریننگ میں مختلف صوبائی محکموں کے افسران نے شرکت کی۔ ڈی جی ہیلتھ نے کہا کہ وبائی امراض کے خاتمے کے لیے مختلف اداروں کی شراکت ناگزیر ہے تاہم محکمہ صحت کو ملٹی سیکٹرول ایپروچ میں مرکزی کردار ادا کرنا ہے۔ انہوں نے زور دیتے ہوئے کہا کہ ڈینگی کے خاتمے کے لئے صرف محکمہ صحت نہیں بلکہ دیگر متعلقہ اداروں کو بھی اپنا کردار ادا کرنا ہوگا۔

شرکاء سے خطاب کرتے ہوئے انہوں نے کہا کہا ملٹی سیکٹر ایپروچ کے تحت ریپڈ رسپانس ٹیموں کو اضلاع کی سطح پر لے کر جانا ہے۔ انہوں نے کہا کہ مختلف اداروں کی شراکت اور تعاون سے نہ صرف وسائل کی بچت ہوتی ہے بلکہ کسی بھی صورت حال سے نمٹنا بھی سہل ہو جاتا ہے۔