وزیراعظم عمران خان نے خیبرپختونخواہ کے لیے بڑے منصوبوں کا اعلان کیا ہے، بیرسٹر محمد علی سیف

پشاور(اردو پوائنٹ تازہ ترین اخبار ۔ 18 جنوری 2022ء) معاون خصوصی اطلاعات خیبرپختونخواہ بیرسٹر محمد علی سیف نے منگل کے روز میڈیا کو بریفنگ دیتے ہوے کہا کہ وزیراعظم عمران خان نے گزشتہ روز دورہ صوبے کے لیے بڑے منصوبوں کا اعلان کیا ہے۔  انہوں نے کہا کہ وزیراعظم کے اعلانات کے مطابق خیبرپختونخوا میں بجلی کی ترسیل کو بہتر بنانے کے لیے ڈسٹریبیوشن سسٹم ( این ٹی ڈی سی )کی بہتری کے لیے وفاقی حکومت 20 ارب روپے خرچ کرے گی،جس سے بجلی کا ترسیلی نظام بہتر ہوگا اور لوڈ شیڈنگ سمیت دیگر مسائل ختم ہو جائیں گے۔

انھوں نے کہا کہ ویلنگ سسٹم کو اگلے 30 دنوں میں فعال کر دیا جائے گا۔ اس سے بجلی کی فراہمی میں مزید بہتری آئے گی۔آف گریڈ مائیکرو ہائیڈل نظام لایا جا رہا ہے جس کے تحت صوبے میں 5 سو چھوٹے ڈیم بنائے جائیں گے۔

(جاری ہے)

اس نظام سے پیدا ہونے والی بجلی براہِ راست صوبے کے استعمال میں لائی جائے گی۔یہ سستی بجلی دور دراز کے ان علاقوں کو بھی فراہم کی جا سکے گی جہاں ٹرانسمیشن لائن نہیں ہے۔

معاون خصوصی نے کہا کہ پانی سے پیدا ہونے والی بجلی کو قابل تجدید توانائی  کے طور پر استعمال میں لایا جائے گا۔انھوں نے کہا کہ سی پیک کے تحت رشکئی اکنامک زون کی طرز پر مزید 6 سپیشل اکنامک زونز بنائے جائیں گے۔ ان زونز سے نہ صرف خیبرپختونخوا میں مزید ترقی آئے گی بلکہ روزگار کے بھی بے پناہ مواقع پیدا ہوں گے۔ بیرسٹر سیف نے کہا کہ وزیراعظم عمران خان نے کل ہری پور میں پاکستان ڈیجیٹل سٹی سپیشل ٹیکنالوجی زون کا افتتاح کیا۔

پاکستان ڈیجیٹل سٹی ہری پور حکومت خیبر پختونخوا کا آئی ٹی کے شعبے میں فلیگ شپ منصوبہ ہے۔ اس منصوبے پر 1 ارب 31 کروڑ روپے لاگت آئے گی اور یہ 86 کنال اراضی پر تعمیر کیا جائے گا۔انھوں نے کہا کہ خیبر پختونخوا میں مزید دو سے تین اسپیشل ٹیکنالوجی زونز تعمیر کیے جائیں گے۔ان ٹیکنالوجی زونز کا مقصد آئی ٹی کے شعبہ کو فروغ دینا اور نوجوانوں کو اس شعبہ کو مہارت کی ٹریننگ دینا ہے۔

اس سے نوجوانوں کو باعزت روزگار ملے گا اور وہ عالمی سطح اپنی صلاحیتوں کا لوہا منوا سکیں گے۔ انھوں نے کہا کہ چشمہ رائٹ بینک کنال کے ساتھ ساتھ لفٹ کنال پراجیکٹ پر بھی کام شروع کر رہے ہیں،جس سے 3 لاکھ ایکڑ سے زائد اراضی سیراب ہوگی اور اس سے بڑی سطح پر معاشی سرگرمیاں شروع ہوں گی اور نوکریاں پیدا ہوں گی۔ اس پراجیکٹ سے زرعی پیداوار اضافہ ہوگا اور فوڈ سکیورٹی کی صورتحال میں مزید بہتری ساتھ زراعت کی صنعت میں بھی بہتری آئے گی جس سے پراسیسڈ فوڈ کے پراجیکٹ لگائے جائیں جو کہ براہ راست بیرونی سرمایہ کاری کی راہ ہموار ہو گی۔

انھوں نے کہا کہ صوبائی حکومت نے نئے سیاحتی مقامات کی نشاندہی کر دی ہے۔چترال شندور کو ایکسپریس وے سے منسلک کرنے کے ساتھ ساتھ بہتر روڈ نیٹ ورک بچھایا جائے گا۔معاون خصوصی نے کہا کہوفاقی و صوبائی حکومت ضم شدہ اضلاع کی ترقی پر خصوصی توجہ دے رہی ہے۔ ضم  شدہ اضلاع میں بھی سیاحت کو فروغ دینے کے منصوبے زیر غور ہیں۔ حکومت نے ضم  شدہ اضلاع کے سالانہ ترقیاتی بجٹ کو 24 ارب کی سطح سے بڑھا کر رواں سال 54 ارب روپے کر دیا ہے۔

پنجاب کا 16 ارب روپے کا شیئر بھی اب خیبرپختونخوا کو ملے گا جس سے مجموعی طور پر ضم اضلاع میں 70 ارب روپے خرچ کیے جائیں گے۔انہوں نے کہا کہ احساس راشن پروگرام لانچ کر دیا گیا ہے۔ اس پروگرام سے اشیائے خورد و نوش پر ایک ہزار روپے کی رعایت دی جائے گی جس سے خیبر پختونخوا کے ایک کروڑ مستحق خاندان اس سے مستفید ہوں گے۔ انہوں نے شہریوں سے اپیل ہے انسداد پولیو مہم شروع ہے، اپنے 5 سال تک عمر کے تمام بچوں کو پولیو سے بچاو  کے قطرے ضرور پلائیںاورشہری کورونا وائرس سے بچاو کی بوسٹر ڈوز بھی لگوائیں۔