گندھارا ہندکو اکیڈمی کی پشاور کے تعلیمی اداروں کے ہندکووان اکیڈیمک سٹاف کیلئے خصوصی نشست

پشاور۔ (اُردو پوائنٹ اخبارتازہ ترین - اے پی پی۔ 10 دسمبر2018ء) گندھارا ہندکو اکیڈمی کے زیر اہتمام پشاور کی یونیورسٹیوں اور کالجوں کے ہندکووان اکیڈیمک سٹاف کیلئے ایک خصوصی نشست کا انعقاد پیر کو کیا گیا جس کی صدارت گندھارا ہندگو بورڈ کے جنرل سیکرٹری محمد ضیاء الدین نے کی ۔اجلاس میں گندھارا ہندکو اکیڈمی کے ڈائریکٹر ،ڈپٹی ڈائریکٹرکے علاوہ پشاورکی سرکاری و نجی یونیورسٹیوں کے اکیڈیمک سٹاف نے کثیر تعداد میں شرکت کی۔

اجلاس سے خطاب میں محمد ضیاء الدین نے کہا کہ زبان ہماری شناخت کا ذریعہ ہے جس کی اہمیت سے انکار ممکن نہیں‘ ہندکو زبان خیبر پختونخوا کی دوسری بڑی زبان ہے‘ گندھارا ہندکو بورڈ اور گندھارا ہندکو اکیڈمی گزشتہ 25 سال سے ہندکو سمیت دیگر علاقائی زبانوں کی ترقی کیلئے اپنی خدمات سرانجام دے رہے ہیں۔

(جاری ہے)

انہوں نے کہا کہ ہندکو زبان کے فروغ کیلئے ہمیں مل کر کردار ادا کرنے کی ضرورت ہے۔

اجلاس کے شرکاء نے گندھارا ہندکو اکیڈمی کی کارکردگی کو سراہتے ہوئے کہا کہ ہندکو زبان کی ترویج و ترقی میں گندھارا ہندکو بورڈ کے جنرل سیکرٹری محمد ضیاء الدین کی انتھک محنت اور خدمات کو فراموش نہیں کیا جا سکتا۔اجلاس کے آخر میں ہندکو زبان کی ترویج ترقی کیلئے مل کر کردار ادا کرنے کے عزم کا اعادہ کیاگیا۔شرکاء نے آنے والی ہندکو کانفرنس میں گندھارا ہندکو اکیڈمی سے مکمل تعاون کی یقین دہانی بھی کرائی۔