وزیر زراعت میجر (ر) سجاد بارکوال کی زیرصدارت محکمہ سائل اینڈ واٹر کنزرویشن کے منصوبوں کے حوالے سے اجلاس کا انعقاد

پشاور (اُردو پوائنٹ اخبارتازہ ترین - اے پی پی۔ 18 اپریل2025ء) خیبر پختونخوا کے وزیر زراعت میجر (ر) سجاد بارکوال کی زیرصدارت محکمہ سائل اینڈ واٹر کنزرویشن کے منصوبوں کے حوالے سے ضلعی افسران کا پشاور میں ایک اجلاس منعقد ہوا، جس میں ایڈیشنل سیکرٹری نجم السحر، ڈائریکٹر جنرل سائل اینڈ واٹر کنزرویشن محمد نذیر اور محکمہ سائل اینڈ واٹر کنزرویشن کے ضلعی افسران نے شرکت کی۔

اجلاس میں وزیر زراعت نے ترقیاتی منصوبوں کی پیشرفت، وسائل کے شفاف استعمال، اور پانی کے تحفظ سے متعلق اہم ہدایات جاری کرتے ہوئے واٹر کورسز کی تعمیر کے جاری منصوبوں کو بروقت مکمل کرنے، ضلعی افسران کو دیے گئے ٹارگٹس پورا کرنے، اور ترقیاتی بجٹ کے بروقت اورشفاف استعمال پر زور دیا۔ انہوں نے باقاعدہ فیلڈ وزٹس کرنے، جاری منصوبوں کی رفتار تیزکر نے، محکمانہ سطح پر کمی وکوتاہی نہ کرنے کی ہدایت کی۔

(جاری ہے)

صوبائی وزیر زراعت میجر (ر) سجاد بارکوال نے پانی کے تحفظ اور جدید ٹیکنالوجی سے متعلق اظہار خیال کرتے ہوئے پانی کے ضیاع کو روکنے کے لیے جدید آبپاشی نظام پر عمل کرنے، پانی کے بہتر استعمال کے لئے عوامی آگاہی مہم چلانے اور بارش کے پانی کو ذخیرہ کرنے کی سہولیات میں اضافہ کرنے کی ہدایات بھی دیں۔ صوبائی وزیر زراعت نے مزید کہا کہ پانی ہماری قومی دولت ہے، اس کے بہتر انتظام کے بغیر زراعت کی ترقی ناممکن ہے۔

وسائل کا استعمال شفافیت کے ساتھ ہو۔اس موقع پر ڈائریکٹوریٹ جنرل سائل اینڈ واٹر کنزرویشن نے بتایا کہ پختہ تالاب، چیک ڈیمز اور مائیکرو واٹرشیڈ کی ترقی جیسے منصوبوں پر کام جاری ہے اور مستقبل میں خیبر پختونخوا میں ڈیزاسٹر رسک ریڈکشن (DRR)، واٹر ہارویسٹنگ اسٹرکچرز بڑھانے کے لیے نئے اقدامات پر توجہ دی جائے گی، جس کا مقصد صوبے کو پائیدار ترقی دینا اور موسمیاتی چیلنجز سے اسے نمٹنے کے قابل بنانا ہے۔صوبائی وزیر سجاد بارکوال نے تمام افسران کو اجلاس میں جاری کردہ احکامات پر فوری عملدرآمد یقینی بنانے کی ہدایت کرتے ہوئے کہا کہ عوامی مفاد میں کام کرتے ہوئے ہر سطح پر شفافیت کو یقینی بنایا جائے۔