رواں برس پنجاب میں کاشتکاروں کو رعائتی نرخوں پر 1700لیزر لینڈ لیولرزدیے جائیں گے

راولپنڈی ۔ (اُردو پوائنٹ اخبارتازہ ترین - اے پی پی۔ 21 ستمبر2019ء) محکمہ زراعت پنجاب نے زرعی پیداوار میں اضافے کیلئے لیزر لینڈ لیولرز کی رعایتی قیمت پر فراہمی کیلئے درخواستوں کی وصولی کا آغاز کردیا ، درخواستیں 10اکتوبر 2019 تک وصول کی جائیں گی۔ زرعی ترجمان نے اے پی پی کو بتایاکہ قومی منصوبہ برائے اصلاح کھالہ جات (پنجاب) کے تحت سال 2019-20 میں 1700 لیزر یونٹس شفاف قرعہ اندازی کے تحت کاشتکاروں کو سبسڈی پر فراہم کئے جائیں گے۔

فی لیزر یونٹ 2لاکھ50ہزار روپے سبسڈی فراہم کی جائے گی۔ لیزر یونٹس حاصل کرنے کیلئے درخواست دہندہ کے پاس لیزر لیولر چلانے کیلئے ذاتی ٹریکٹر ہونا ضروری ہے۔ مالک / خود کاشتکار / مزارعہ / پٹہ دار / زرعی گریجویٹ کے پاس رقبہ ساڑھے 12 ایکڑ سے زیادہ نہ ہو اور ترجیحی طور پر زرعی مشینری کی خدمات کرایہ پر دے رہا ہو۔

(جاری ہے)

ترجمان نے قومی خبر ایجنسی کو بتایاکہ درخواست دہندہ اپنے علاقے میں ہمواری زمین بذریعہ لیزر ٹیکنالوجی کی خدمات فراہم کرنے کیلئے متفق ہو۔

درخواست دہندہ منصوبہ کی مدت کے دوران سالانہ 300 ایکڑ زمین کی ہمواری کیلئے خدمات فراہم کرنے کیلئے تیار ہو۔ ایسے کاشتکار جو پہلے حکومت کی کسی اور سکیم کے تحت لیزر یونٹ حاصل کر چکے ہیں وہ اس سکیم سے فائدہ نہیں اٹھا سکتے۔ اہل درخواست گزاروں کو الاٹمنٹ متعلقہ ضلع کے ڈپٹی کمشنر کی زیر نگرانی قائم ضلعی کمیٹی کرے گی جس کیلئے اگر ضروری ہوا تو قرعہ اندازی ہوگی۔

خواہشمند کاشتکار ہر لحاظ سے مکمل درخواست معہ متعلقہ دستاویزات ڈپٹی ڈائریکٹر زراعت (اصلاح آبپاشی) کے دفتر میں مقررہ تاریخ تک جمع کروائیں۔ مجوزہ درخواست فارم ڈپٹی ڈائریکٹر زراعت (اصلاح آبپاشی)، اسسٹنٹ ڈائریکٹر زراعت (اصلاح آبپاشی) کے دفتر سے مفت حاصل کریں یا محکمہ زراعت پنجاب کے اصلاح آبپاشی کی ویب سائٹ www.ofwm.agripunjab.gov.pk سے ڈائون لوڈ کیے جاسکتے ہیں۔مزید معلومات و رہنمائی کیلئے متعلقہ ڈپٹی ڈائریکٹر زراعت کے دفاتر سے رابطہ کریں۔