آرمی چیف جنرل قمر جاوید باجوہ کا پاکستان آرڈیننس فیکٹریز اور ہیوی انڈسٹریز ٹیکسلا کا دورہ

بدھ 21 اگست 2019 22:50

راولپنڈی ۔ (اُردو پوائنٹ اخبارتازہ ترین - اے پی پی۔ 21 اگست2019ء) چیف آف آرمی سٹاف جنرل قمر جاوید باجوہ نے پاکستان آرڈیننس فیکٹریز (پی او ایف) اور ہیوی انڈسٹریز ٹیکسلا (ایچ آئی ٹی) کا دورہ کیا۔ پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے پی او ایف اور ایچ آئی ٹی کا دورہ کیا۔ انہوں نے اس موقع پر واہ نوبل کیمیکلز فیکٹری میں پلانٹ کا افتتاح کیا۔

(جاری ہے)

یوریا پلانٹ 8 ماہ کی مدت میں مکمل ہوا، پلانٹ میں جدید ٹیکنالوجی کی تنصیب سے پیداواری لاگت کم ہو گی۔ آرمی چیف نے پی او ایف ڈسپلے سینٹر میں رکھی مصنوعات دیکھیں جبکہ ایچ آئی ٹی میں انہوں نے ٹینکوں اور دفاعی مصنوعات کی تیاری کا جائزہ لیا۔ آئی ایس پی آر کے مطابق آرمی چیف نے ہدایت کی کہ پی او ایف مشترکہ منصوبوں کے لئے متحرک اقدامات کرے، مختلف مصنوعات کی تیاری کیلئے نجی شعبے سے مشترکہ معاہدے کیے جائیں۔ دریں اثناء آرمی چیف جنرل قمر جاوید باجوہ نے دفاعی اور سیکورٹی آلات کے معیار پر اطمینان کا اظہار کیا اور کہا کہ ادارے اعلیٰ معیار کے آلات بنا کر قومی خزانے کی بچت کر رہے ہیں۔