ایمانداری، خوش اخلاقی اور بروقت مدد موٹر ویز پولیس کا نصب العین ہے، محمد عامر ذوالفقار خان

راولپنڈی(اُردو پوائنٹ اخبارتازہ ترین - آن لائن۔ 15 جولائی2018ء) آئی جی نیشنل ہائی ویزاینڈ موٹر ویز پولیس محمد عامر ذوالفقار خان نے کہا ہے کہمسافروں کو محفوظ بنانے اور بروقت مدد فراہم کرنے کے لئے تمام وسائل بروے کار لائے جائیں۔ ایمانداری ، خوش اخلاقی اور بروقت مددموٹر ویز پولیس کا نصب العین ہے جس پر کوئی سمجھوتہ نہیں کیا جائے گا۔ ہم اپنے دستیاب وسائل میں رہ کر سائنسی بنیادوں کے ذریعے نتائج حاصل کر کے اس محکمے کو مزید مثالی بنائیں گے ان خیالات کا اظہار انہوں نے پولیس افسران کے اجلاس عام سے خطاب کرتے ہوئے کیا اجلاس سے پہلے دربار سپاہ میں شہداہ مستونگ کے لیے خصوصی دُعا کی اور شہداہ کی قربانیوں کو سلام پیش کیا ،اُنہوں نے اپنے خطاب میں ہدایات دیں کہ موٹر ویز پولیس ٹریفک قوانین سے متعلق تعلیم کو ہر شہر ، گائوں، تعلیمی مراکز، مدارس اور دیگر اداروں میں عام کرے گی تاکہ قیمتی انسانی جان ومال کی حفاظت کی جاسکے۔

(جاری ہے)

مزید اُنہوں نے افسران کی فلاح وبہبود کے انتظامات کی یقین دہانی کرائی تاکہ افسران اور جوانوں کے حوصلے مزید بلند ہو،دربار سپاہ میں افسران اور جوانوں نے انھیں درپیش مسائل سے آگاہ کیا ربار سے خطاب کرتے ہوئے آئی جی موٹر ویز پولیس نے وقت پر پروموشن کے لیے فوری لائحہ عمل بنانے کے احکامات جاری کیئے،انسپکٹر جنرل نے ہدایات جاری کیں کہ شاہرائوں پر فرائض سر انجام دیتے ہوئے کسی سے بھی امتیازی سلوک نہیں کیا جائے گا بلکہ قانون کی پاسداری بلاخوف وخطر یکساں طور پر عمل میں لائی جائے گی۔

ہماری سپاہ کو کسی کے ساتھ زیادتی نہیں کرنی چاہیے اور ایسی غلطی کے مرتکب کے خلاف سخت سے سخت قانونی کاروائی کی جائے گی۔ افسران کی عزت نفس پر کوئی سمجھوتا نہیں کیا جائے گا اس دوران خوش اخلاقی کا دامن ہاتھ سے نہ چھوڑا جائے۔ انہوں نے موٹر سے پولیس کے افسران کی کارکردگی کو سراہا اور ہدایات دیں کہ اسے مستقل بنیادوں پر جاری رکھا جائے۔