آر پی او راولپنڈی عمران احمر کی سربراہی میں اعلیٰ سطحی اجلاس

راولپنڈی (اُردو پوائنٹ اخبارتازہ ترین - اے پی پی۔ 28 مئی2022ء) ریجنل پولیس آفیسر راولپنڈی عمران احمر کی سربراہی میں پولیس لائنز ہیڈ کوارٹرز میں اعلیٰ سطحی اجلاس منعقد ہوا۔ اجلاس میں سٹی پولیس آفیسر راولپنڈی سید شہزاد ندیم بخاری، ایس ایس پی انوسٹی گیشن غضنفر علی شاہ، ایس ایس پی آپریشنز وسیم ریاض خان، ڈویژنل ایس پیز، ایس ڈی پی اوز، ایس ایچ اوز اور سی پی او آفس سٹاف نے شرکت کی۔

آرپی او راولپنڈی عمران احمراور سی پی او راولپنڈی سید شہزاد ندیم بخاری نے انسپکٹرجنرل آف پولیس پنجاب کے ویژن کے مطابق افسران کو ترجیحات سے آگاہ کیا۔آر پی اوعمران احمر کا کہنا تھاکہ تھانہ کی سطح پر شہریوں کو بہترین سہولیات فراہم کی جائیں، مقدمات کے بروقت اندراج کو ہر صورت یقینی بنایا جائے ،کوتاہی برداشت نہیں ہو گی،بدعنوانی، جرائم پیشہ عناصر کی پشت پناہی پر زیر وٹالیرنس ہو گی،محکمہ سے ہماری عزت ہے، محکمہ کا وقار ہر صورت مقدم رکھیں۔

(جاری ہے)

اس موقع پر سی پی او راولپنڈی سید شہزاد ندیم بخاری نے کہا کہ خواتین اور بچوں، اقلیتوں سے متعلق معاملات پر فوری رسپانس کو یقینی بنایا جائے، قبضہ مافیا کے خلاف زیروٹالیرنس پالیسی ہے، فورس کی ویلفیئر میں تھانے یا آفس کی سطح پر کوتاہی برداشت نہیں ہو گی،اچھے کام پر جزا اور غلط کام پر سزا کی پالیسی پر مکمل عمل درآمد ہوگا، ایس ایچ او4سے6بجے شام اپنے دفاتر میں شہریوں کے مسائل سنیں گے،ہرمشکل وقت میں آپ مجھے اپنے ساتھ کھڑا پائیں گے۔

سی پی او سید شہزاد ندیم بخاری نے کہا کہ ہر افسر و اہلکار کی کارکردگی جانچنے کے لیے الگ سے ونگ بنایا جائے گا، ڈویژنل ایس پیز کرائم میٹنگز کرکے جرائم کی روک تھام کی مربوط حکمت عملی بنائیں اور اس پر عملدرآمد کروائیں،مقدمات کے بروقت چالان اور میرٹ پر تفتیش کو یقینی بنایا جائے۔