اڈیالہ میں ملاقات کیلئے آئے پی ٹی آئی کے 5 رہنمائوں کو حراست میں لے لیا گیا

راولپنڈی (اُردو پوائنٹ اخبارتازہ ترین - آن لائن۔ 12 نومبر2024ء) اڈیالہ میں ملاقات کیلئے آنے والے قائد حزب اختلاف قومی اسمبلی عمر ایوب، قائد حزب اختلاف سینٹ سینیٹر شبلی فراز اور قائد حزب اختلاف پنجاب ملک احمد بچھر کو پولیس نے نہایت بدسلوکی کا نشانہ بناتے ہوئے تحویل میں لے لیا ‘سابق سپیکر قومی اسمبلی اسد قیصر اور صاحبزادہ حامد رضا بھی گرفتار کرلیا گیا۔

جیل ذرائع کے مطابق ان رہنمائوں کو دفعہ144کی خلاف ورزی پرگرفتارکیا گیا ہے جبکہ معلوم ہوا ہے کہ اپوزیشن لیڈر عمرایوب نے پولیس اور انتظامیہ سے بدتمیزی بھی کی اور کہا کہ تم لوگ ملازم ہو ،اصل حکمران ہم ہیں۔پانچوں رہنما عمران خان سے ملاقات کیلئے اڈیالہ جیل گئے تھے ۔دو بجے تک جیل حکام نے ملاقات نہ کروائی اور انتظار کا کہتے رہے ۔

(جاری ہے)

پانچوں رہنما تین بجے دوبارہ ملاقات کیلئے گئے مگر ملاقات نہیں کروائی گئی ۔

پانچوں رہنما واپسی کیلئے اپنی گاڑیوں میں سوار ہوئے تو پولیس نے جھنڈے والی گاڑیوں میں سے گھسیٹ کر انہیں اتار لیا اور نہایت بدسلوکی کا نشانہ بناتے ہوئے گرفتار کر لیا ۔پانچوں رہنماوں کو ندیم نامی ایس ایچ او نے اڈیالہ چوکی میں بٹھا لیا ۔پاکستان تحریک انصاف کی جانب سے حزب اختلاف کی پارلیمانی قیادت کی ظالمانہ گرفتاریو کی شدید مذمت کی گئی اورسینیٹر شبلی فراز، عمر ایوب، احمد بچھر، اسد قیصر اور صاحبزادہ حامد رضا کی فوری رہائی کا مطالبہ کیا گیا ہے۔دوسری جانب جیل ذرائع کا کہنا ہے کہ ان رہنمائوں کودفعہ144کی خلاف ورزی اور پولیس و انتظامی افسران سے بدتمیزی کے الزامات پرحراست میں لیا گیا اور تحقیقات شروع کر دی گئی ہے۔