پی ٹی آئی کارکن نوید اسلم نے خاتون پوسٹ ماسٹر کو تشدد کا نشانہ بنا دیا

ملزم نے آفس میں آکر تھپڑ مارے اور زدوکوب کیا، پولیس نے کمزور دفعات کے ساتھ مقدمہ درج کیا، ملزم ضمانت پر رہا ہوگیا، ملزم دھمکیاں دے رہا ہے کہ میں وزیراعلیٰ کو کہہ کرسب کو اٹھوا دوں گا۔ پوسٹ ماسٹر صوفیہ قاسم کا بیان

sanaullah nagra ثنااللہ ناگرہ اتوار ستمبر 19:37

پی ٹی آئی کارکن نوید اسلم نے خاتون پوسٹ ماسٹر کو تشدد کا نشانہ بنا دیا
ساہیوال(اردوپوائنٹ اخبار تازہ ترین۔ آئی پی اے ۔27 ستمبر2020ء) تحریک انصاف کے کارکن نوید اسلم نے خاتون سینئر پوسٹ ماسٹر کو تشدد کا نشانہ بنا دیا، پوسٹ ماسٹر صوفیہ قاسم نے کہا کہ ملزم نے تھپڑ مارے اور زدوکوب کیا،پولیس نے کمزوردفعات کے ساتھ مقدمہ درج کیا ، ملزم ضمانت پر رہا ہوگیا، ملزم دھمکیاں دے رہا ہے کہ میں وزیراعلیٰ کو کہہ کرسب کو اٹھوا دوں گا۔

تفصیلات کے مطابق ساہیوال میں سینئر پوسٹ ماسٹر پر تشدد کا واقعہ پیش آیا ہے، ضلع کچری میں مجسٹریٹ نے ملزم نوید اسلم کو ضمانت پر رہا کردیا ہے۔نوید اسلم نے24ستمبر کو پوسٹ آفس میں جاکرخاتون پوسٹ ماسٹر صوفیہ قاسم کو تھپڑ مارے اور زدوکوب کیا۔ ملازمین نے صوفیہ قاسم کو بچایا، اور نوید اسلم کو آفس سے باہر نکالا۔صوفیہ قاسم نے بتایا کہ پولیس نے نوید اسلم کے مقدمے میں درست دفعات نہیں لگائی، جس کا ملزم کو فائدہ ہوا ہے، پولیس نے نوید اسلم کو مقدمہ درج کرکے گرفتار کیا تھا لیکن دفعات درست اور سخت نہ ہونے پر ملزم ضمانت پر رہا ہوگیا ہے۔

(جاری ہے)

صوفیہ قاسم نے کہا کہ نوید اسلم نے بغیر اجازت لیے، بغیر کوئی بات کیے میرے منہ پر تھپڑ مار دیا، مجھے ملزم کا پتا ہی اس وقت چلا جب اس نے میرے منہ پر تھپڑ مار ا۔مجھے گھسیٹا۔نوید اسلم نے دھمکیاں دیں کہ میں پی ٹی آئی کا ورکر ہوں، آپ میرا کچھ نہیں بگاڑ سکتے، میں ابھی وزیراعلیٰ عثمان بزدار کو فون کرتا ہوں، تم سب لوگوں کو اٹھوا دوں گا۔پولیس نے مقدمہ میری مدعیت میں درج کیا ہے لیکن ایف آئی آر میں ایسی دفعات شامل کی گئیں کہ ایک دن میں اس نے سیاسی اثررسوخ استعمال کرکے ضمانت پر رہا ہوگیا ہے۔

انہوں نے کہا کہ اس ملک میں کوئی خاتون محفوظ نہیں ہے۔ پوسٹ آفس ملازمین نے احتجاج کیا کہ تحریک انصاف کے کارکن نوید اسلم نے پوسٹ آفس میں ملازمین کے ساتھ بدتمیزی کی اور سینئر پوسٹ ماسٹر کو زدوکوب کیا ہے۔نوید اسلم وزیراعلیٰ پنجاب کا نام لے کر بدمعاشی کرتا ہے۔دوسری جانب ملزم نوید اسلم نے اپنے بیان میں کہاکہ میں نے خاتون پوسٹ ماسٹر پر تشدد نہیں کیا۔محکمہ کا کنٹریکٹر ہوں اپنی ترسیلات لینے گیا تھا۔خاتون نے ترسیلات دینے سے انکار کیا اور پی ٹی آئی کو برا بھلا کہا۔ میرے پا س کوئی اسلحہ نہیں تھا۔

ساہیوال شہر میں شائع ہونے والی مزید خبریں:

Your Thoughts and Comments