پانچ روزہ انسداد پولیو مہم 21ستمبر سے شروع ہو گی

سرگودہا (اُردو پوائنٹ اخبارتازہ ترین - اے پی پی۔ 19 ستمبر2020ء) ضلع سرگودہامیں پانچ روزہ انسداد پولیو مہم 21ستمبر سے شروع ہو گی مہم کے دوران ضلع بھر کے پانچ سال تک کی عمر کے چھ لاکھ 48ہزار650 سے زائد بچوں کو پولیو سے بچاؤ کے قطرے پلائے جائیںگے ۔ ضلع بھر کی 167یونین کونسلوں میں میڈیکل عملہ پر مشتمل 1460موبائل ‘198مستقل‘14 رومنگ اور 67ٹرانزٹ ٹیمیں تشکیل دی گئی ہیں ۔

قومی پولیو مہم 23ستمبر تک جاری رہے گی جبکہ 24اور 25 ستمبر کو کیچ اپ ڈے ہوںگے ۔ مہم کو کامیاب بنانے کیلئے محکمہ صحت سمیت دیگر اداروں کے 3784 فیلڈ اہلکار گھر گھر جا کر بچوں کو قطرے پلائیں گے ۔ اس امر کاانکشاف آج ڈپٹی کمشنر عبداللہ نیئر شیخ کی زیر صدارت پولیو مہم کے جائزہ اجلاس میں کیاگیا ۔ اجلاس میںاے ڈی سی جی بلال فیروز ‘سی او ہیلتھ اتھارٹی ڈاکٹر رائے سمیع اللہ ‘ڈی ایچ او ڈاکٹر ریاض ‘ ڈاکٹر سہیل اصغر قاضی ‘ تمام تحصیلوں کے اسسٹنٹ کمشنرز ‘سی او ایجوکیشن ریاض قدیر سمیت ریسکیو 1122 ۔

(جاری ہے)

بہبود آبادی او رپولیس کے افسران نے شرکت کی۔اجلاس سے خطاب کرتے ہوئے ڈپٹی کمشنر عبداللہ نیئر شیخ نے کہاکہ وطن عزیز کے مستقبل او رآج کے نونہالوں کو ہمیشہ کی معذوری سے بچانے کیلئے پولیو مہم کو کامیاب بنانا متعلقہ اداروں کی اولین ذمہ داری ہے ۔ پولیو کے سو فیصد اہداف کے حصول کو یقینی بنانے کے عزم کے ساتھ کام کیا جائے ۔ انہوں نے کہاکہ والدین پولیو ٹیموں سے مکمل تعاون کریں او راپنے بچوں کو پولیو سے بچاؤ کے دو قطرے ضرور پلائیں ان کی زرا سی کوتاہی زندگی بھر کاپچھتاوا ہے ۔

ڈپٹی کمشنر نے محکمہ صحت پر زور دیا کہ وہ والدین میں غیر حقیقی خدشات کو دور کرنے کیلئے بھر پور آگاہی مہم چلائیں ۔ انہوں نے کہاکہ دنیا میں صرف پاکستان او رافغانستان دو ممالک ہیں جہاں پولیو وائرس ختم نہیں ہوا جو ایک بڑی معاشرتی ناکامی ہے ۔انہوں نے کہاکہ پولیو ورکرز کو کورونا ایس اوپیز کاپابند بنایا جائے او ران کی فول پروف سیکورٹی پر بھی کوئی سمجھوتہ نہیں کیا جائیگا ۔

ڈپٹی کمشنر نے کہا کہ ہمارے ماحول میں پولیو وائرس پازیٹو پایاگیا ہے ہر بچے تک پہنچنا او راسے پولیو سے بچاؤ کے قطرے پلانا لازم ہے ۔ انہوں نے علماء کرام پر زور دیا کہ وہ اس ضمن میں عوام الناس میں آگاہی پیدا کریں ۔ انہوںنے اے سی صاحبان کو پولیو ٹیموں کی روزانہ کی بنیاد پر مانیٹرنگ یقینی بنانے او رضلع بھر کے اہم مقامات پر آگاہی بینرز ‘پینا فلیکس لگانے کی ہدایت کی ۔انہوں نے پولیو پلان کے ناقص انتظامات ڈی ایچ او ڈاکٹر سہیل اصغر کی سرزنش کرتے ہوئے سی او ہیلتھ ڈاکٹر رائے سمیع اللہ کو جواب طلبی کرنے کی بھی ہدایت کی۔