پی پی 139 ضمنی الیکشن، ن لیگ نے اپنی جیتی ہوئی نشست پر دوبارہ میدان مار لیا

شیخوپورہ (اُردو پوائنٹ اخبارتازہ ترین۔ 05 دسمبر2024ء) پی پی 139 ضمنی الیکشن، ن لیگ نے اپنی جیتی ہوئی نشست پر دوبارہ میدان مار لیا۔ تفصیلات کے مطابق پنجاب اسمبلی کے حلقہ پی پی 139 شیخوپورہ میں ہونے والے ضمنی الیکشن کے غیر سرکاری غیر حتمی نتائج سامنے آ گئے۔ غیرحتمی غیر سرکاری نتیجے کے مطابق پاکستان مسلم لیگ ن کے رانا طاہر اقبال 44535 ووٹ لے کر کامیاب ہوگئے۔

جبکہ پاکستان تحریک انصاف کے حمایت یافتہ اعجاز حسین 20093 ووٹ لے کر دوسرےنمبر پر رہے۔ یہ نشست مسلم لیگ ن کے رکن پنجاب اسمبلی رانا افضال حسین کے انتقال پر خالی ہوئی تھی۔ ضمنی الیکشن کے نتائج پر وزیر اعظم شہباز شریف کی جانب سے بھی ردعمل دیا گیا ہے۔ اپنے پیغام میں وزیر اعظم نے کہا کہ وزیراعظم شہبازشریف نے ضمنی الیکشن پی پی 139شیخوپورہ میں ن لیگ کی کامیابی پر مبارکباد پیش کی ہے، انہوں نے کہا کہ پی پی 139میں برتری پارٹی پالیسیوں پر عوام کے اعتماد کی عکاسی ہے۔

(جاری ہے)

مہنگائی کی شرح 38فیصد سے کم ہوکر 4.9 فیصد پر آگئی ہے جس سے عام آدمی کی زندگی میں آسانی آئی۔ معاشی اشاریوں میں بہتری کی بدولت پی پی 139 کے عوام نے فیصلہ سنا دیا۔ ضمنی انتخاب میں عوام نے انتشار کی بجائیترقی خوشحالی کے حق میں فیصلہ دیا۔ضمنی انتخاب نے جلاؤ گھیراؤ کے بیانیئے کو مسترد کردیا ہے۔ عوام سے کئے گئے وعدوں پر عملدرآمد کیلئے دن رات کوشاں ہیں۔

نوازشریف کی قیادت میں عوامی خدمت کے مثبت نتائج سامنے آنے لگے ہیں۔ نوازشریف کی قائدانہ سوچ اور پارٹی ورکرز کی محنت کی بدولت فتح نصیب ہوئی ۔ مریم نواز بھی دن رات عوام کی خدمت اور صوبے کی ترقی کیلئے مصروف ہیں۔ عوام ملک میں حقیقی معاشی ترقی اور خوشحالی لانے والوں کو منتخب کرچکی ہے۔ وطن کو ترقی کی بلندیوں تک پہنچانے کیلئے شبانہ روز محنت جاری رکھیں گے۔

دوسری جانب پنجاب اسمبلی کے حلقہ پی پی۔ 139شیخوپورہ کے ضمنی انتخاب میں لڑائی جھگڑے کے واقعات میں کوئی کارکن زخمی نہیں ہوا۔ ترجمان الیکشن کمیشن پنجاب کے مطابق پولنگ سٹیشن پر جھگڑے کے واقعات کو پولیس کی مداخلت سے پر امن طریقے سے نمٹا لیا گیا ہے۔ انہوں نے کہا کہ تصادم کے دوران کارکنان کے زخمی ہونے کی تردید کرتے ہیں۔