جنوبی وزیرستان،سکیورٹی آپریشن میں شہید 2 فوجی جوان پورے فوجی اعزاز کے ساتھ سپرد خاک

پیر 17 اپریل 2023 12:56

جنوبی وزیرستان(اُردو پوائنٹ اخبارتازہ ترین - این این آئی۔ 17 اپریل2023ء) ضلع زرملان میں سکیورٹی آپریشن کے دوران شہید ہونے والے 2 فوجی جوانوں کو پورے فوجی اعزاز کے ساتھ سپرد خاک کردیا گیا۔پاک فوج کے شعبہ تعلقات عامہ آئی ایس پی آر کے مطابق لانس نائیک شعیب علی شہید اور سپاہی رفیع اللہ شہید کی نماز جنازہ جنوبی وزیرستان کے علاقے وانا اور بعد میں اٴْن کے آبائی قصبوں میں ادا کی گئی اور دونوں شہدا کو پورے فوجی اعزاز کے ساتھ سپرد خاک کر دیا گیا۔

نماز جنازہ میں فوجی افسران و جوانوں سمیت سول حکام، عوام اور شہدا کے لواحقین کی بڑی تعداد نے شرکت کی۔آئی ایس پی آر کے بیان کے مطابق پاکستان کی مسلح افواج دہشت گردی کی لعنت کو کسی بھی قیمت پر ختم کرنے کے لیے پٴْرعزم ہیں۔

(جاری ہے)

ایسی قربانیاں ہی ہمارے عزم کو مضبوط کرتی ہیں۔واضح رہے کہ جنوبی وزیر ستان کے ضلع زرملان میں سکیورٹی آپریشن کے دوران پاک فوج کے 2 جوان شہید ہوگئے تھے۔

اس واقعے میں 8 دہشت گرد بھی مارے گئے تھے۔ آئی ایس پی آر کے مطابق سکیورٹی فورسز نے ہفتے کو انٹیلی جنس بنیادوں پر آپریشن کیا، اس دوران فورسز اور دہشت گردوں کے درمیان شدید فائرنگ کا تبادلہ ہوا جس میں لانس نائیک شعیب علی (عمر 25 سال، رہائشی پاراچنار، ضلع کرم) اور سپاہی رفیع اللہ (عمر 22 سال، ساکن ضلع لکی مروت) بہادری سے لڑتے ہوئے شہید ہوئے۔شہدا نے سوگواران میں بیواؤں اور والدین کو غمگسارچھوڑا ہے۔