شاہ بیلو جنگلات میں ڈاکوؤں کے خلاف آپریشن جاری رہے گا، ڈاکٹر جمیل احمد

جرائم پیشہ کو کسی صورت بخشا نہیں جائے گا، آپریشن کے مثبت نتائج آرہے ہیں،ایڈیشنل آئی جی سکھر

منگل 26 مارچ 2019 19:13

سکھر (اُردو پوائنٹ اخبارتازہ ترین - این این آئی۔ 26 مارچ2019ء) ایڈیشنل آئی جی سکھر رینج ڈاکٹر جمیل احمد نے کہا ہے کہ شاہ بیلو جنگلات میں ڈاکوؤں کے خلاف آپریشن جاری رہے گا۔ جرائم پیشہ کو کسی صورت بخشا نہیں جائے گا، یہ بات انہوں نے ایس ایس پی سکھر عرفان علی سموں کے ہمراہ شاہ بیلو کچے میں آپریشن کا جائزہ لینے کیلئے دورے کے موقع پر افسران و جوانوں اور میڈیا سے گفتگو کرتے ہوئے کہی۔

ایڈیشنل آئی جی سکھر رینج ڈاکٹر جمیل احمد نے کہا کہ آپریشن کے مثبت نتائج آرہے ہیں۔ پولیس کے جرائم پیشہ افراد ، ڈاکوؤں اور دیگر کرمنلز کے خلاف کاروائیوں سے سکھر رینج میں جرائم میں خاطر خواہ کمی ہوئی ہے۔ انہوں نے کہا کہ امن و امان کی صورتحال بہتر ہے ، اسے مزید بہتر سے بہتر کرنا اولین ترجیح ہے۔

(جاری ہے)

ایڈیشنل آئی جی سکھر ڈاکٹر جمیل احمد نے شاہ بیلو جنگلات کے دورے کے موقع پر ڈاکوؤں کے خلاف آپریشن کے لیے تعینات جوانوں سے ملاقاتیں کی اور افسران کو ضروری ہدایات دیں۔

ایڈیشنل آئی جی سکھر ڈاکٹر جمیل احمد نے کہا کہ سکھر اور لاڑکانہ کے تمام علاقوں ، کچے کے علاقوں دریائی حصوں سمیت شہری علاقوں میں تعینات پولیس کو جدید خطوط پر کام کرنے کی ہدایات دی گئیں ہیں جس سے سکھر رینج میں پولیس کا مورال بلند اور مجموعی جرائم مین واضع کمی آئی ہے۔