پریذائیڈنگ افسر کو تھپڑ، وڈیرے کے خلاف مقدمہ درج

تھرپارکر(اُردو پوائنٹ اخبارتازہ ترین - آن لائن۔ 30 جون2022ء) پریزائیڈنگ افسر کو تھپڑ، وڈیرے کے خلاف مقدمہ درج۔تفصیلات کے مطابق سندھ میں بلدیاتی انتخابات کے پہلے مرحلے کی ووٹنگ کے دوران پریزائیڈنگ افسر کو تھپڑ مارنے پر وڈیرے غلام محمد جونیجو کے خلاف مقدمہ درج ہو گیا۔مقدمہ غلام محمد جونیجو اور 5 نامعلوم افراد کے خلاف درج کیا گیا ہے، مقدمے میں پولنگ اسٹیشن میں مداخلت، ہنگامہ آرائی، تشدد اور دیگر دفعات کو شامل کیا گیا ہے۔

یاد رہے کہ چھبیس جون کو اسلام کوٹ ڈسٹرکٹ تھرپارکر میں بلدیاتی انتخابات کے پہلے مرحلے کے دوران محکمہ صحت کے ضلعی افسر غلام محمد جونیجو نے پریزائیڈنگ افسر گھنشام داس کو تھپڑ مار دیا تھا، جس کی ویڈیو وائرل ہو گئی تھی۔گزشتہ روز الیکشن کمیشن نے اس وائرل ویڈیو کا نوٹس لیتے ہوئے ڈسٹرکٹ ریٹرننگ افسر، ڈسٹرکٹ مانیٹرنگ افسر اور ڈسٹرکٹ الیکشن کمشنر سے رپورٹ مانگی تھی، تاکہ باضابطہ کارروائی شروع کی جا سکے۔

(جاری ہے)

الیکشن کمیشن سندھ نے ریٹرننگ افسر ضلع لاڑکانہ کو بھی ایک خط لکھ کر کہا تھا کہ پیپلز پارٹی کے رکن قومی اسمبلی خورشید جونیجو نے یو سی 13 بلدیاتی انتخابات میں ضابطہ اخلاق کی خلاف ورزی کی ہے، اس واقعے کی تفصیلی رپورٹ الیکشن کمیشن آف پاکستان میں فوری جمع کرائی جائے۔اس خط کے ساتھ الیکشن کمیشن نے سوشل میڈیا پر وائرل ہونے والی ویڈیوز بھی منسلک کیں، خط میں کہا گیا تھا کہ ویڈیوز میں خورشید جونیجو کو بلدیاتی انتخابات کے پہلے مرحلے میں دھاندلی کرتے ہوئے دیکھا جا سکتا ہے۔#