Na Marne Ka Dukh, Urdu Nazam By Aabid Adeeb

koi mere larazte hath mein
kaghaz ka purza aur qalam pakDa raha tha
kabhi kuchh zer-e-lab hi baDbaDa kar
koi isbaat mein
aankhon ki aur mathe ki jumbish chahta tha
kabhi danton mein honTon ko daba kar
koi rone ki koshish kar raha tha

koi to chand lamhon baad apne
baal bikhrane gareban nochne ki fikr mein tha
koi ghamgin chehra aur siyah malbus mein
behad hasin malum deta tha
mere ajdad ke namon ko ganwa kar
koi mujh se talluq joDta tha

sabhi nazdik the mere
udhar bhai bhatije the
udhar bahnen thin bhanje the
phir un ke baad
rishte joDne wale saf-ara the

ye lagta tha ki kuchh hi der mein
matam bapa hoga
main un baaton se
bistar par paDa
aankhon ko thoDi si khuli rakh kar
baDe dilchasp muD mein tha

sabhi ghamgin the lekin
tamannaen thin aankhon mein

yakayak main ne karwaT li
aur aankhen khol kar uThne ki koshish ki
to dekha
sabhi ke lab pe masnui hansi thi
chamak aankhon se ghaeb thi