Piyare Piyare, Urdu Nazam By Aadil Aseer Dehlvi

پڑھنا لکھنا سکھائے

اچھی راہ بتائے

بد سے ہمیں بچائے

اچھا بچہ بنائے

بھیا پیارا پیارا

گھنٹی خوب بجائے

بستہ بھی لٹکائے

مکتب لے کر جائے

جلدی سے پہنچائے

رکشا پیارا پیارا

پھولوں پر اترائے

خوشبو بھی بکھرائے

گھر آنگن مہکائے

ہریالی بھی لائے

گملا پیارا پیارا

بھیا لے کر جائے

سرکس بھی دکھلائے

لڈو بھی کھلوائے

جو چاہو مل جائے

میلہ پیارا پیارا

جب جب یہ لہرائے

سب کی شان بڑھائے

جس کے ہاتھ یہ آئے

آگے بڑھتا جائے

جھنڈا پیارا پیارا

تاریکی میں آئے

بستر تک پہنچائے

لوری بھی سنوائے

سپنے بھی دکھلائے

سونا پیارا پیارا

سب کو مار بھگائے

جو دیکھے ڈر جائے

الٹی شامت لائے

دشمن کوئی آئے

ڈنڈا پیارا پیارا

بارش میں کام آئے

باہر لے کر جائے

خود تو بھیگا جائے

لیکن ہمیں بچائے

چھاتا پیارا پیارا

جگ مگ روپ دکھائے

چندا ریجھا جائے

رستہ بھی بتلائے

لیکن ہاتھ نہ آئے

تارا پیارا پیارا

تل کر منا کھائے

خاگینہ بنوائے

سالن میں پک جائے

منی کو للچائے

انڈا پیارا پیارا

جب یہ موسم آئے

صحت خوب بنائے

ڈھیروں کپڑے لائے

پھر بھی دور نہ جائے

جاڑا پیارا پیارا

کھانا جب بھی آئے

آگے بڑھ کر لائے

ہم کو سب کھلوائے

خود بھوکا رہ جائے

چمچہ پیارا پیارا

بازاروں میں نکلے

ہاتھ میں سب کے لٹکے

جو کچھ بھی یہ دیکھے

اپنے پیٹ میں رکھے

تھیلا پیارا پیارا

میٹھا میٹھا کھاؤ

منا بولے لاؤ

جلدی سے پکواؤ

سارا چٹ کر جاؤ

حلوہ پیارا پیارا

چاہے کوئی بلائے

سب کی گود میں جائے

دیکھے تو للچائے

ٹافی بسکٹ چائے

ننھا پیارا پیارا

پانی ٹھنڈا کر دے

سر پہ کٹورا رکھے

دوڑے آئیں پیارے

جو چاہے وہ پی لے

مٹکا پیارا پیارا

صورت رنگ برنگی

حالت بھی ہے اچھی

بستر کا ہے ساتھی

عادت میں ہے نرمی

تکیہ پیارا پیارا

گرمی دور بھگائے

ٹھنڈا موسم لائے

تھوڑی بجلی کھائے

بہتر کام بنائے

پنکھا پیارا پیارا

چم چم چمکا جائے

بجلی سا لہرائے

جلدی جلدی آئے

ساتھ میں چلتا جائے

جوتا پیارا پیارا

سب سے پہلے جاگے

پیڑ پہ چڑھ کے بیٹھے

دیواروں پر بھاگے

ککڑوں ککڑوں چیخے

مرغا پیارا پیارا

گھر میں دوڑ لگائے

باہر بھاگ کے جائے

بلی پر غرائے

ننھے کو بہلائے

کتا پیارا پیارا

پیٹھ پہ ہمیں بٹھائے

سرپٹ دوڑ کے جائے

منزل پر پہنچائے

تب جا کر سستائے

گھوڑا پیارا پیارا

جلدی سے اٹھ جائے

چیخے اور چلائے

دانہ پتے کھائے

پھر بھوکا رہ جائے

بکرا پیارا پیارا

پنجرے میں پر تولے

ٹھمک ٹھمک کر ڈولے

جب بھی منہ کو کھولے

میٹھی بولی بولے

طوطا پیارے پیارا

روئی کو لپٹائے

دھاگا بنتا جائے

ہاتھوں میں بل کھائے

بل کھا کر لہرائے

تکلا پیارا پیارا

چوروں سے لڑ جائے

ڈاکو سے ٹکرائے

جو بھی چابی لائے

اس کے بس میں آئے

تالا پیارا پیارا

سڑکیں بھی دکھلائے

گلیوں میں لے جائے

کون کدھر کو جائے

بھید یہ سب بتلائے

نقشہ پیارا پیارا

کلیوں پر منڈ لائے

پھولوں سے بتلائے

ناچے جھومے گائے

مستی میں لہرائے

بھونرا پیارا پیارا

شب کو منہ دکھلائے

سورج سے شرمائے

بادل میں چھپ جائے

رات ہوتے ہی آئے

چندا پیارا پیارا

جھیل کے پاس ہی بیٹھے

چھوٹی مچھلی پکڑے

ہنس ہو کوئی جیسے

موتی کھانے آئے

بگلا پیارا پیارا

آنکھوں سے لگ جائے

راحت ہی پہنچائے

کالے کالے شیشے

ابر کے ٹکڑوں جیسے

چشمہ پیارا پیارا

میرا ہمدم ساتھی

ایسا نہ ہوگا کوئی

صورت بھی ہے پیاری

سیرت بھی ہے اچھی

بستہ پیارا پیارا

وقت پہ سو کر اٹھے

وقت پہ اپنے کھیلے

وقت پہ پڑھنے جائے

اول نمبر آئے

بچہ پیارا پیارا