Husn-e-shah-e-laulak Jo Chamka Shab-e-mearaj, Urdu Ghazal By Abdul Halim Sharar

husn-e-shah-e-laulak jo chamka shab-e-mearaj
jalwon se nabi subh-e-tajalli shab-e-mearaj

kya KHub jama wasl ka naqsha shab-e-mearaj
matlub naya talib-e-shaida shab-e-mearaj

paya na taqarrub kisi maKHluq ne aisa
jaisa ki mila shah ko rutba shab-e-mearaj

talib tha KHuda banda-e-mahbub ka apne
mehman-e-KHuda nur-e-KHuda tha shab-e-mearaj

ganjina-e-rahmat se habib-e-azali ko
kya kya nahin allah ne baKHsha shab-e-mearaj

ta-der rahi talib-o-mtlub mein qurbat
dil bhar ke maza wasl ka luTa shab-e-mearaj

kanon ne suna jo kabhi kanon na suna tha
aankhon ne na dekha tha jo dekha shab-e-mearaj

aalam ko kiya mast mai-e-husn-e-azal ne
be-kar raha saghar-o-mina shab-e-mearaj

nalain mubarak ka hua faKHr jo hasil
bas jhum gaya arsh-e-mualla shab-e-mearaj

allah ka didar mohammad ki shafaat
'mail' ko mili hashr ke din ya shab-e-mearaj