Maflooj, Urdu Nazam By Abdul Salam Bengluri

میں نے سوچا بھی نہ تھا اتنا بدل جاوٴں گا

میرا چہرہ بھی نہ ہوگا مرے چہرے کی طرَح

زیست کی دھوپ بھی ہوجائے گی ٹھنڈی یکلخت

شام کے وقت کسی پیڑ کے سائے کی طرح

زندگی عمر کے صفحات میں کھو جائے گی

کسی اخبار کے بوسیدہ تراشے کی طرَح

میں نے سوچا ہی نہ تھا اتنا بدل جاوٴں گا

ہاتھ پاوٴں میں پڑی ہونگی مَنوں زنجیریں

بوجھ بن جائے گا خود میرا بدن میرے لئے

ایک کمرے میں سمٹ جائے گی دنیا میری

صبحِ بیمار ہے یا شامِ محن میرے لئے

میری تحریر کا تقریر کا دم ٹوٹ گیا

اب نہیں لوح و قلم، بزمِ سخن میرے لئے

میرے بس میں ہی نہیں ہیں مرے اعصابِ ضعیف

چارہ گر ہار گئے سر بہ گریباں ہیں طبیب

جاگتے ذہن میں ہیں کرب کے شعلے رقصاں

خوف کا دل میں ہے سیلابِ بلا کوئی مہیب

دل ہے فریاد کْناں شام و سحر یا اللہ

کیا مجھے صحتِ کامل نہ کبھی ہوگی نصیب

سچ تو ہے بے بسی جینے نہیں دیتی لیکن

حوصلہ ہار کے حاصل مجھے ہونا کیا ہے

زندگی ہے تو تگ و دو کے بہانے ہیں بہت

ہاتھ پاوٴں ہوئے شل، دل تو ابھی زندہ ہے

میں نے سوچا ہی نہ تھا خود سے یہ کہنا ہوگا

زندگی ہے تو امیدوں کا دِیا جلتا ہے