Main Akser Bhool Jata HooN, Urdu Nazam By Abdul Salam Bengluri

میں اکثر بھول جاتا ہوں

مناظر، واقعے، باتیں

عموماً جو بھلائے جا نہیں سکتے

ابھی کچھ روز پہلے ہی کسی نے مجھ کو گالی دی

مگر یہ یاد آتا ہی نہیں مجھ کو

کہ کس نے دی

کہاں، کب، کیوں

سبب کیا تھا

مرے اک دوست نے آکر

پُرانا قرض لوٹایا

تو میں حیرت سے بول اٹھّا

لیا تھا کیا ،کہاں؟ کب؟ سچ!

عجب ہے حافظہ میرا

غرَض کی باتیں تو وہ بھول جاتا ہے

مگر جو غم زدہ کر دیں

جو دل میں آگ سی بھر دیں

وہ باتیں یاد رکھتا ہے

وہ کمسن بے نوا لڑکی

مغل دربار کے باہر

پھٹی پوشاک میں لپٹی

حمل پورا ہتھیلی اَدھ کھلی آگے

صدا مدھم ،مدد مائی مدد بابا

بصارت سے تہی آنکھیں

خدا کے بندو کچھ خیرات دے جاوٴ

اذیت دہ منظر تھا ،مگر بولو

بھلا یہ باتیں کوئی یاد رکھتا ہے

نشے میں دھت وہ پٹھو خاں

بڑی مونچھیں گْدے بازو

پکڑ کر گُدّی کے بالوں سے عورت کو

زمیں پر کھینچ کر لے جا رہا تھا یوں

کہ جیسے بھینس ہو کوئی

سسکتی ،گالیں، بکتی

ذلالت کے تعفن میں بسر کرتے

یہ جاہل شرم سے عاری

حقیرادنیٰ یہ کمتر نسلِ انسانی

اِنھیں بھی یاد رکھتا ہے بھلا کوئیَ؟

مثالیں اور بھی ہیں خوف ہے لیکن

طوالت کا

سمجھ میں اسقدر تو آگیا ہوگا

کہ کتنا عام لوگوں سے

جدا ہے حافظہ میرا

کہ باتیں فائدے کے، بھول جاتا ہے

اذیت ناک منظر یاد رکھتا ہے