Diyar E Rafta Ka Qissa Koi Sunao Mian, Urdu Ghazal By Abrar Ahmad

دیار رفتہ کا قصہ کوئی سناؤ میاں

وہ دکھ جو سوے ہوے ہیں انھیں جگاؤ میاں

جو پاس ہے اسی غم سے یہ دن بتاؤ میاں

اب اس کے وعدہ فردا کو بھول جاؤ میاں

نہ تم نہ دنیا تمھاری ، ہمارے بس میں ہے

ہمیں تو دیکھنا ہے جو بھی دن دکھاؤ میاں

یہ آپ ہم خس و خاشاک ہیں ، ہمارا کیا

ہمیں تو بہنا ہے جس سمت ہو بہاؤ میاں

فساد و شور طلب میں گنوا دیا ہے اسے

وہ ایک شے جسے کہتے تھے رکھ رکھاؤ میاں

اگر نہیں رخ آئندہ کی خبر معلوم

تو پھر چراغ رہ رفتگاں جلاؤ میاں

نہیں ہے گر کوئی رنگ نشاط کی صورت

تو اس زمیں پہ کوئی حشر ہی اٹھاؤ میاں

ہمیں کہ زخم نظارہ پسند بھی ہے بہت

اور اب کے اس کی جھلک سے لگا ہے گھاؤ میاں

یہ نقد جاں لیے آئے تھے ہم تمھارے حضور

سو تم بھی کرنے لگے ہم سے بھاؤ تاؤ میاں

یہ بے گھری تو بہر طور ساتھ ہے ، پھر بھی

برا بھلا ہی سہی گھر کوئی بساؤ میاں

نہیں رہے گا نشاں تک جہان امکاں میں

جو ہو سکے تو یہاں بات کچھ بناؤ میاں