Hanooz Neend Main Hain, Urdu Nazam By Abrar Ahmad

تم ایک سیاہ گلاب کی طرح کھل اٹھتے ہو

اور تمہاری پتیاں

میرے دل کے آنگن میں

آہستگی سے گرتی رہتی ہیں

میری آنکھ ہی نہیں کھلتی

ریشمی نیندوں والی رات میں

تم ایک گھنے لمس کی صورت

میرے بستر میں گنگنانے لگتے ہو

اور میری آنکھ ہی نہیں کھلتی

عمر کی منڈیروں سے دن

پرندوں کی طرح

ایک ایک کر کے اڑ جاتے ہیں

اور ان کے گرے ہوے پروں کے ساتھ

ہوا کھیلتی رہتی ہے

وقت اپنا کاہل ماتھا دیواروں سے ملتا رہ جاتا ہے

گلیاں اور مکان

موسموں اور چہروں سے بھر جاتے ہیں

میدانوں میں ہوا سیٹیاں بجاتی ہے

ایک ہاتھ ----------

تمہاری لرزتی ہوئی شاخ پر جھک جاتا ہے

بادل ، زمین کا ماتھا چوم کر

رو دیتے ہیں

آوازوں کا سیل

میری کنپٹیوں سے ٹکراتا ہے

پلکوں پر دنوں کا نم

بوندوں کی طرح برسنے لگتا ہے

دوریوں کی اوٹ سے

تم ، میری جانب دیکھتے ہو

موسموں کی گھنی ردا میں لپٹی ہوئی

اپنی مخروطی انگلیاں

تم -- میرے سینے میں گاڑ دیتے ہو

اور میری آنکھ ہی نہیں کھلتی